Kalaallit arnat Danmarkimiittut ajornartorsiutaat ataatsimiissutigileraat
Inuuniarnermikkut Ajornartorsioqqajaasut pillugit Siunnersuisoqatigiit kalaallit arnartaasa ajornartorsioqqajaasut namminneq isumaat tusarusuppaat, arnanullu ajornartorsiutinik oqallinnermi peqataatikkusullugit.
- Taakkumi inuiaqatigiinnut peqataanngitsutut ittarput, tamannalu allanngortittariaqarpoq. Siunnersuisoqatigiit tamakkununnga tunngasuni periusissiornermi nutaami oqalliseqataatikkusuppai, Inuuniarnermikkut Ajornartorsioqqajaasut pillugit Siunnersuisoqatigiit allapput.
Danmarkimi kalaallit arnartaasa inuuniarnermikkut ajornartorsioqqajaasut pillugit misissuineq nutaaq Inuuniarnermikkut Ajornartorsioqqajaasut pillugit Siunnersuisoqatigiit ataatsimiinnermi saqqummiutissavaat.
- Danmarkimi kalaallit arnartaasa inuuniarnermikkut ajornartorsioqqajaasut inissisimanerat misissuinermi nikallunganartumik eqqartorneqarpoq. Inooqatigiinnikkut, kulturikkut suiaassusertillu pillugu ajornartorsiuteqarput, tamannalu allanngortikkusukkaluarlugu ikiorneqartinnatik allanngortissinnaanngilaat, Inuuniarnermikkut Ajornartorsioqqajaasut pillugit Siunnersuisoqatigiit allappoq.
Inuuniarnermikkut Ajornartorsioqqajaasut pillugit Siunnersuisoqatigiit siulittaasua Jann Sjursen, Folketingimut Inuit Ataqatigiinnit ilaasortaq Aaja Chemnitz Larsen, danskillu isumaginninnermut ministeriat Karen Ellemann ataatsimiinnermut peqataassapput.
