Kalaallit Airports sanaartugassanik pilersaarusiortutut tamaginnut siunnersortissarsisoq

Suliffeqarfik siunnersuisartoq, COWI A/S Kalaallit Airports A/S-imut Ilulissani, Qaqortumi Nuummilu mittarfittaassanik sanaartortoqalerpat siunnersortaassaaq.

Kalaallit Airportsip COWI A/S isumaqatigiissuteqarfigaa. Kalaallit Airports A/S tusagassiutinut taama allappoq.

Taamaammat ingeniørit suliffeqarfiutaat COWI A/S Kalaallit Airports A/S-ip Ilulissani, Qaqortumi Nuummilu mittarfiliornissaanut sanaartugassanik pilersaarusiortutut tamaginnut siunnersortaalissaaq. Masanti A/S-ilu COWI A/S-imut siunnersortaalluni taamaaliornikkut pilersaarusiornermi ilisimasat, piginnaasaqarfiit najukkamilu inerisaanissaq qulakkeerneqassaaq.

Kalaallit Airportsip COWI-mik pilersaarusiortutut tamaginnut siunnersorteqarnissaanik aalajangiinermi aningaasaqarneq, aaqqissuussaaneq, inuttalersuineq minnerunngitsumillu najukkami aallussinissaq pingaartinneqarput.

COWI aamma Masanti ataatsimut isigalugit iluaqusiinerpaasussamik neqerooruteqarput, aammalu mittarfiliassanut annertoorsuarnut pingasunut taakkununnga tamaginnut siunnersuisartussamut isumaqatigiissutit maannakkut inissimmata nuannaarutigisorujussuuarput, Kalaallit Airportsimi pisortaaneq, Steffen Ulrich Lynge oqarpoq.

Nuummi Inuplan A/S sanaartornissamut pisussanut pilersaarutinik pingasunik taakkuninnga suliaqarup nalaani siunnersortaavoq. COWI pilersaarusiornermik aallartippat Inuplan Kalaallit Airportsimut siunnersortitut ingerlaannassaaq ingerlatseqatigiiffiullu kissaataasa pisariaqartitaasalu suliassani piviusunngortinneqarnissaat qulakkiissavaat.

AAMMA ATUARUK Kalaallit Airports illuliassanik titartaasartunik unammisitsilersoq

Pilersaarusiorneq aallartittoq

Ilulissat 2.200 meterisut takigisumik mittarfittaarnissaanut pilersaarusiorneq aggustip qulingiluaani aallartereerpoq.

Oktobarillu aallaqqaataani Nuummi mittarfittaassaq aamma 2.200 meterisut takitigisoq pilersaarusiorneqassalluni, Qaqortumilu mittarfittaassaq 1.500 meterisut takissuseqartussaq qaammatit arlallit qaangiuppata pilersaarusiorneqassaaq.

Nunarput 2018-imi pingasunik mittarfittaassasoq

Mittarfinnut pilersaarusiornissat tamarmik qaammatini arfineq pingasuni suliarineqarnissaat naatsorsuutigineqarpoq. Tamatumalu kingorna mittarfiit sanaartornissaanut neqeroortitsisoqassaaq.

- Suliassat pilersaarusiorneqarnerisa siumut ingerlanerat nuannaarutigaarput. Suliaqarneq piffissamut pilersaaruterput naapertorlugu suli ingerlavoq, oqartussallu aamma timmisartumik angalanermik suliaqartut suliassaqarfiit akimorlugit suleqatigiinneq nuannersoq misigaarput. Tamanut siunnersuisartussanut isumaqatigiissutit inissimmata suliassami immikkoortut tulliannut qilanaarpugut, Steffen Ulrich-Lynge oqarpoq.

Sanaartugassanut pilersaarusiorneq pilersaarutit malillugit ingerlassappata mittarfiit pingasut taakkua sanaartorneqarnerat 2018-imi aallartissaaq. Qaqortup Mittarfia 2020-mi novembarimi naammassissaaq. Ilulissat Nuullu mittarfissaat oktobarimi 2021-mi naammassissasut, tusagassiutinut nalunaarummi allassimavoq.

AAMMA ATUARUK Kalaallit Airportip mittarfissanut pilersaarutai ingerlalluartut

 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!