Kalaallip Skagenimi toqutaanera pillugu suliami tigusaasoqaqqittoq

Angut 19-inik ukiulik inatsit tunngaviusoq naapertorlugu Hjørringimi eqqartuussivimmi marlunngormat killisiorneqarnermi kingorna apriilip pingajuata tungaanut paarigallagassanngortinneqarpoq.

Angut pinngitsuunerartoq angutip 20-nik ukiullip ukiup aallartilaarnerani toqutsisimasutut pasineqarpoq.

Jyllandip avannaata politiivini politikommissæri, Henrik Staal, taama ilisimatitsivoq.

- Paasiniaanerput tunngavigalugu angut alla paarigallagassanngortipparput, Jyllandip avannaata politiivini politikommissæri, Henrik Staal, taama oqarpoq.

Taanna oqaluttuarpoq angut 19-inik ukiulik suliamut tunngatillugu siornatigut politiinit tigusaasimasoq. Taamanili ullut marluk paarigallarneqareerluni iperagaavoq.

Angutit allat pingasut, 27-nik, 28-nik 41-nillu ukiullit, suliamut tunngatillugu politiinit paarigallarneqarput. Taakku tamarmik toqutsisimasutut pasineqarput pinngitsuunerarlutilli.

Angut 20-nik ukiulik Skagenimi inissiamini Skagavejimiittumi januaarip 16-iani nassaarineqarpoq. Angut ima aqqunarsimatigaaq ullut marlussuit qaangiummata toqulluni.

Angut 20-nik ukiulik savimmik qiuutinillu qitikkut kapoorneqarsimavoq. Aamma niaquata saarnga pingasoriarluni putusimavoq kiinaatalu saarngi aamma innarlerneqarlutik.

Angutit pineqartut aallaqqaammut toqutseriaraluarsimasutut pasineqarlutik unnerluutigineqaraluarput, angulli 20-nik ukiulik toqummat toqutsisimasutut pasineqarlutik unnerluutigineqarput.

20-nik ukiullip sakkortuupilussuarmik saassunneqarneranut suna pissutaasimanersoq Henrik Staalip oqaaseqarfigerusunngilaa.

Saassussineq ikiaroornartut pillugit aaqqiagiinngissuteqarnermik aallaaveqarnera tusagassiuutit siornatigut allaaserivaat.

/ritzau/