Kalaalimerngit nerisarineqaannassanerpat?

Amerikamiut atuagassiaanni Mother Jonesimi issittumi mingutsitsinermut ataatillugu issittormiut nerisaat sukumiisumik allaaserai.

Inuit issittormiut sumik nerissanerlutik aalajangiussiniarnerminni nalornissuteqassagunavissut atuagassiaq allappoq.

Puisip arferullu neqaat aqerlumik kviksølvimik PCB-mik allanillu ulorianartunik akoqarput, inuillu issittormiut timaani nalinginnarmik annertunermik taakku nassaassaallutik.

Akuutissat uliorianartut avannaarsuata issittarnera pillugu arrotikkuminaapput.

Naatsumik oqaatigalugu avannaarsua akuutissanik ulorianartunik arrortikkuminaatsunik eqqaavinngorsimasoq, atuagassiaq Mother Jones allappoq.

Akuutissat ulorianartut imaq silaannarlu aqqutigalugit naalagaaffinnit suliffissuaqarfinnit assartorneqartarpoq.

- Nerineq inuup kinaassusianut pingaaruteqaqaaq, inuillu ileqqutik pigiumaanartarmatigik, timerput akuutissanik kræfteqarlernartunik, meeqqanullu inunngorlaanut akortinik akoorneqarpoq, tusarfiit assigiinngitsut atuagassiamut oqarput.

Allaaserisami sammineqarpoq 2002-mi tunumi misissuisimaneq. Misissuinermi tassani arnat meerartaaqqammersut immuisa kiisalu inunngorlaat aavernerisigut aap akui 50-seriaat angullugu akuutissanik ulorianartunik akoqartut, paasissutissallu europamiunut sanilliukkaanni annertuupilorujussuupput.

Akuutissat timip imminut illersorniarneranut, sianiutinullu akornutaasarput, ingammik meeqqamut naap iluaniittumut. Meeqqallu oqimaassusiat allanngorarsinnaaqaaq, eqqaamasaataat millisinnaaqaaq, meeqqallu ilikkarniartarnerat sunnerneqarsinnaalluni.

Allaaserisarlu malillugu issittormiut suna nerisariaqarnerlugu nalornissuteqarsinnaalersinnaapput, tassami issittumi nerisassat inuussutissarissaanermikkut tusaamaneqarluarput, soorlu puulukip nersussuulluunniit orsuatut puallarnartiginngilaq, maannali oqaatigineqarsinnaalerpoq nerisassat ulorianarsilluinnarsimasut.