Arctic Circle Kalaaleq ilinniartoq unamminermi ajugaasoq

Unammeqataasut universitetinit tallimaneersut aqqaneq-marluk Issittumi unamminartut qanoq aaqqiissuteqarfigineqarsinnaanerannut isumassarsiaminnik saqqummiipput.

Tassanilu Ilisimatusarfimmeersoq, 30-nik ukiulik Tukumminnguaq Nykjær Olsen ajugaavoq.

Tukumminnguaq Nykjær Olsenip isumassarsiaa "Innovation is about inclusion - let’s make Arctic inclusive"-mik qulequtaqarpoq.

Unamminermi peqataasut aqqaneq marluk isumassarsiatik tuluttut minutsini marlunni affarmilu saqqummiuppaat. Tamatumalu kingorna tusarnaartut isumassarsiatsialaanerpaajusorisaminnik taasipput.

Tukumminnguaq Nykjær Olsenillu isumassarsiaa tusarnaartunit 250-it missaaniittunit taaguunneqarnerpaajuvoq.

Taassuma isumassarsiaa tassaavoq, atuarfinni europamiut ilisimasaat atorlugit atuartitsinerup saniatigut nunaqavissut ilisimasaasa akuutinneqarnerunissaat.

Atuarfeqarfiit europamiut atuartitseriaasaannut massakkut maleruuppallaartut, ilisimasallu tamarmik atuartitsinermi akuutinneqartariaqartut, Tukumminnguaq Nykjær Olsen isumaqarpoq.

- Nuannaqaanga ajugaagama, nuannaarutigalugulu tusarnaartut isummannik isumaqataasinnaammata, neriullungalu isummersuutikka tiguneqarumaartut tamattami nunarsuatsinni inissaqartariaqarpugut, Tukumminnguaq Nykjær Olsen nuannaangaarluni islandimit taama oqarpoq.