Aningaasaqarnermut siunnersuisoqatigiit: Meeqqat atuarfiini siusinaartumik iliuuseqartoqarli
Meeraq meeqqat atuarfianni 3.klassimi ingerlalluarsimanngikkuni taava meeqqat atuarfianni inaarutaasumik misilitsinnermini ingerlalluannginnissaa ilimanarpoq.
Aningaasaqarnermut Siunnersuisooqatigiit misissuineranni tamanna erserpoq.
- Ilinniagaqarneq pingaarutillit amerlasuut peqqutigalugit pingaaruteqartupilussuuvoq. Ilinniartitaaneq pillugu pitsanngoriaateqartoqarpat inuiaqatigiinni suna tamangajaat pitsanngortinneqarsinnaasoq oqaatigineqarsinnavoq.
Torben M. Andersen taama oqarpoq, nassuiarlugulu siunnersuisoqatigiit ukioq manna Nunatsinni aningaasaqarneq pillugu nalunaarusiornerminni sooq aamma ilinniartitaaneq ukkatarisimaneraat.
AAMMA ATUARUK Sulisut amerlanerugunik aningaasaqarneq pitsaanerussasoq
Aningaasaqarnermut siunnersuisoqatigiit inerniliuppaat meeqqat atuarnermik nalaanni qaffariangaatsiaqqinneq ajormata piaartumik iliuuseqarfigineqartariaqartut. Klassit pingajuanni killiffimmi misilitsinnermi angusaqarnerliortut meeqqat atuarfiat qimalerunikku aamma angusaqarnerlunnissaat ilimanartupilussuuvoq.
- 100 procentimik oqaatigineqarsinnaanngikkaluartoq, kisianni qularnanngitsorujussuuvoq meeqqat klasset pingajuanni angusaasigut sunngorumaarnerat takuneqarsinnaavoq.
Ilisimatooq isumaqataavoq
Taamaattumik meeqqat angusamikkut pitsanngorsaavigineqassappata, naggataagullu ilinniagaqarlutik suliffeqalerumaarnissaat qulakkiissagaanni piaartumik sulissuteqarluni iliuuseqarfigineqarnissaat pisariaqarluinnarpoq.
Ilisimatusarfimmi ilinniarnermik ilisimatusarfimmi professori Karen Wistoft taama inerniliussinermut isumaqataavoq, atuarfiillu kajumissaarlugit taamatut misilitsinerit ilungersuullugit sulissuteqarfigisaqqullugit.
- Uani naveersiniartoqanngilaq oqarluni: Ilissi ilinniartitsisut imaluunniit atuarfik iliuuseqanngippallaarpusi. Pitsaaneruvoq oqarluni: Kisitsisit uku ilungersorluta iliuuseqarfigisariaqarpavut, atuarfitsinnut qanoq suliniuteqarsinnaavugut.
Taassuma aamma nassuiarpaa atualeqqaarnermiit, imaluunniit suli pitsaanerussaaq meeqqerivimi aallartikkaanni.
IMAK: Inuuniarnikkut ajornartorsiutit initupput
- Siusinaartumik iliuuseqarnissaq pingaaruteqarpoq pissutigalugu meeqqat atuarfimmi atugarissaarlutik suliaqarsinnaanissaat aamma ataatsimoornernut peqataasinnaannissaat pingaaruteqarmat. Imaappoq atuartitsinerni ilikkagaqarsinnaassapput aamma imminnut allallu ilinniaatigalugit, professori oqarpoq.
AAMMA ATUARUK Siunnersuisooqatigiit sakkortuumik isornartorsiuipput
Aningaasaqarnermut Siunnersuisoqatigiit misissuinerisa takutippaat meeqqat atuarfianni 2010-miit 2013-imut angusaqarnerluttut 80 procentii ilinniakkamik aallartitsisimanngitsut. Ingerlalluartunut kisitsisit 5 procentiusut. IMAK-ip siulittaasua Karl Frederik Danielsen KNR-imut oqarpoq inuuniarnikkut ajornartorsiuterpassuit pissutigalugit atuarfiit atuartut angusaqartikkuminaatsittaraat.
Inuuniarnikkut ajornartorsiutit meeqqat inuunerini inituallaarput kingunerisarpaalu tinguartillutik aallussisinnaasannginnerat, Karl Frederik Danielsen oqarpoq.
