Unammineq Kommunit nutaat qanoq ateqasappat?
Qinersineq maanna naammassereersimalersoq kikkullu qinigaasimanerannik tusassalluta utaqqinitsinni, Qaasuitsup Kommuniani innutaasut allamik eqqarsaatigisassaqarput.
Qaasuitsummi kommunia marlunngorluni aappaagu avippat, kommuniulersussat qanoq ateqassappat?
Kommunit nutaassat marluk qanoq taaguuteqassanersut ilisarnaatissaallu qanoq isikkoqassanersut, Qaasuitsup Kommuniata facebookimi quppernerani unammisitsissutigai.
Innuttaasut kommunini taakkunani marlunni najugallit kisimik unammeqataasinnaapput. Taaguutissanut marlunnut ilisarnaatissanullu marlunnut ajugaasut tamanut immikkut 15.000 koruuninkk akissarsiassaqarput.
Nivinngagaq naapertorlugu kommuninngorumaartut pinngortitakkut, oqaluttuarisaanikkut kulturikkulluunniit ilisarnaataat kommunit taaguutissaanni ilisarineqarsinnaassapput taajuminartuullutillu.
Illoqarfiit ilisarnaatissaat paasiuminartuussapput ilisariuminartuullutik ikinnerpaanillu qalipaateqassallutik, soorlu aappaluttumik, tungujortumik, qernertumik, qorsummik, sungaartumik qaqortumilluunniit.
Kommunini nutassani ikaarsaariarnermi ataatsimiititaliat marluk naliliisussanik toqqaassaaq, taakkualu siunnersuutinik pitsaanerpaajusunik ujarlissapput, ikaarsaariarnermilu ataatsimiititaliat kommunit taaguutissaannik ilisarnaatissaannilu naggataatigullu toqqaasuussapput.
Siunnersuutit kingusinnerpaamik maajip aallaqqaataani 2017, tassalu qaammataajunnaartoq qaangiuppat, nassiunneqariissapput. Unammisitsineq pillugu Qaasuitsup Kommuniata facebookkimi quppernerani paasisaqarnerusinnaavutit:
