KAK-p isikkamik arsaannermi pissartanngorniunnissat kinguartikkai
Angutit arsaannermi pissartanngorniunnissaat Ilulissani aggustip ulluisa qulinganni ingerlanneqassanngilaq.
Taakku pereerneranni arnat Nuummi aamma pissartanngorniunnissaat ingerlanneqassanngilaq.
Isikkamimmi arsaannermi pissartanngorniunnissaq kinguartinneqartoq qaqugulu pissartanngorniuttoqarnissaanut piffissami matumani ulluliisoqanngitsoq KAK-p maanna nalunaarutigaa.
AAMMA ATUARUK Erik pissartanngorniuunnissaq pillugu: Timersornermut aporfiusut – piaartumik – unitsinneqarlik
Tamanna KAK-p siulittaasuata, Finn Meinelip oqaatigaa. Taassuma Namminersorlutik Oqartussat pissartanngorniuttoqarnissaa pillugu sapaatip-akunnerata naanera ataatsimeeqatigai - ilumulli pissartanngorniuttoqarsinnaassanersoq suli akissutersineqanngilaq.
Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
- Kinguartittariaqarparput, siulittaasoq oqarpoq.
- Isikkamik arsaannermi pilersaarutit malillugit pissartanngorniuttoqarnissaa neriuutigisimagaluarparput. qanoq pissartanngorniuttoqarsinnaanissaanut siunnersuutinik aamma nassiussilluta, illersorneqarsinnaasumilli pissartanngorniuttoqarnissaata ingerlannissaanut piffissami matumani akissutissarsinngilagut. Taamaammat naatsorsuutigisatsitut piffissami tassani ingerlannissaa illersorneqarsinnaanngilaq.
Maannakkorpiaq nutaamik ulluliisoqanngitsoq
Finn Meinelip Naalakkersuisunit akissuteqarnissaata tungaanut maannakkorpiaq nunatsinni isikkamik arsaannermi pissartanngorniuttoqarnissaanut atatillugu tuniluuttoratarnissaanut aarlerinarpallaartoq, corona pillugu aqutsisoqatigiit naliliipput.
Aqutsisoqatigiit KNR-imut mailikkut marlunngornermi allapput:
- Isikkamik arsaannermi pissartanngorniuttoqarnissaanut atatillugu peqqissutsimut suliaqartut nalilerpaat aaqqissuussinerni annertuuni taamaattuni tuniluuttoratarnissaa aarlerinarpallaarpoq, corona pillugu aqutsisoqatigiit allapput.
Nunatsinni inuit sumiiffinnit assigiinngitsuneersut katersuutseriarlugit piffissap sivikitsup ingerlanerani angerlaqqinnissaanni immikkut ittumik aarlerinaateqartoq aqutsisoqatigiit aamma nalilerpaat.
AAMMA ATUARUK Isikkamik arsartartoq pakatseqqasoq: Allamik suliaqarallaannarsinnaavunga
- Eqimattani taama tuniluuttoqalissagaluarpat nunatta ilarujussuani ataatsikkut tuniluuttoqaleratarsinnaaneranut aarlerinaateqarpoq. Taamaattoqaraluarunilu nunatsinni piffissap sivikitsup ingerlanerani ataatsikkut nappaalasoqangaatsialeratarsinnaalluni, aqutsisoqatigiit mailikkut akissuteqarlutik allapput.
Finn Meinelip oqarnera naapertorlugu politikerinit akissutissarsisoqannginnerani pissartanngorniuttoqarnissaanut nutaamik ulluliisoqarsinnaanngilaq.
- Piffissanik nutaanik ulluliinissaq piffissami matumani illersorneqarsinnaanngilaq. Namminersorlutik Oqartussaniit akissutersigutta ulluliiniarumaarpugut - tamanna assersuutigalugu septembarimiusinnaavoq, KAK-p siulittaasua oqarpoq.
KNR-ip peqqissutsimut naalakkersuisoq, Anna Wangenheim (D) ullut sisamassaanik akissuteqartinniarsarigaluarpaa. KNR-ip isikkamik arsaannermi pissartanngorniunnerit ingerlanneqarnerannut atatillugu qanoq pisoqaratarsinnaaneranut allattorsimasoqarnersoq ilaatigut paaserusukkaluarpaa. Oqaaseqartinniarnerali maannamut suli periarfissaasimanani.
