Atassut: Kúkop tunuarnerminut patsisigisai akikippallaarujussuarput
- Inatsisartuni suleriaaseq pillugu siunnersuutigisinnaasaanillu immersuiuarneq Malamut ukiuni arlalinngortuni ingerlattuarsimavara. Taamaammat siulersuisuunerit patsisigiinnassallugit akikippallaarujussuaqaaq, Atassummi siulittaasoq Siverth K. Heilmann oqarpoq.
Ilaasortaajunnartuup tunuarnissamik aalajangernini sivisuumik eqqarsaatigisimallugu ippassaq nalunaarutigaa. Siverth K. Heilmann naapertorlugu Mala Høy Kúkop partiimut allamut nuussinnaanini upernaarli sioorasaarutigisimava:
AAMMA ATUARUK Mala Høy Kúko nunagisani pillugu Atassummit tunuartoq
AAMMA ATUARUK Mala Høy Kukop Atassut ilaasortaatitaarutikkaa
- Taamatut eqqarsaateqareersimanini isumaqarpunga nammineq kisimiilluni takutiinnaraa, nammineq suliassani artorai.
Kúko tunuarmat Atassut Inatsisartuni Kommuneqarfik Sermersuumilu kommunalbestyrelsemi ilaasortaatitaaruppoq.
Taamaakkaluartoq Atassutip sulinini nangeqqissavaa Inatsisartunilu ilaasortaatitaqaqqilernissani sulissutigissallugu. Aatsaalli ukiup tulliani taamaaliorsinnaapput.
- Atassummit kommunalbestyrelsimi arlalissuarnik suli ilaasortaatitaqarpugut aamma Inatsisartuni qinigassanngortissaqqaarpugut. Tamanna suaarutigineqariarpat piukkunnarsarluta imaluunniit piareersarluta aallartereerpugut, Atassutip siulittaasua Qeqqatalu kommunalbestyrelsianut ilaasortaq, Siverth K. Heilmann, oqarpoq.
Atassummi siulittaasuusimasoq Knud Kristiansen partiimit upernaaq aamma tunuarpoq.