Københavns Politi oqarasuaatikkut kalerrisaarummut tunngasumik sallusimallutik nassuerput
Politiit oqarasuaatikkut kalerrisaarutaanni angut kalaaliunersoq imaluunniit qallunaajunersoq aperisimanngitsut, maannamut politiit aalajangiusimasimavaat.
Aviisilli ullormut saqqummersartup Politikenip immiussami pissarsiarisimasaani tamanullu saqqummiunneqarsimasumi killormoortuanik uppernarsaatissaqarpoq. Københavnip politiivini politidirektørip Peter Dahlip tamanna maanna nassuerutigaa.
- Assorsuaq uggornarpoq eqqunngitsumik tusarliussaqarsimagatta, KNR-imut oqarpoq.
Oqaloqatigiinneq Politikenip nittartagaani uani tusaaneqarsinnaavoq.
Sumiuussusaanik aperineq naleqquttuunngilaq
Arnap saneqquttup, oktobarip arferngani ualikkut pingasut missaani, 32-inik ukiulik angerlarsimaffeqanngitsoq Daniel Københavnimi illoqannginnersami Amagerbro Torvimi toquusaqqalluni nalasoq naammattoorpaa.
Inuit eqqaani nikorfasut arnamut oqaluttuarput tassani uumaneranik malunnartoqarani akunnerit pingasut missaanni nalasimasoq. Paasissutissat taakku arnap pinartoqartillugu kalerriisarfimmut, 114-imut, oqaatigai. Oqarasuaammi oqaloqataata apeqqutip aappaa apeqqutigisimavaa: angut 'qallunaajunersoq kalaaliunersorluunniit'.
Peter Dahlip aamma nassuerutigaa naleqquttuunngitsoq apeqqutigissallugu angut qallunaajunersoq imaluunniit kalaaliunersoq.
- Kingusinaarluni eqqarsarluaraanni apeqqut naleqqussimanngilaq. Imaakkamili ingerlatsisutta politiinut orniguttussanut immersuileraangamik immersugassaasa ilaanniittarpoq ornitassaanni suut ilisarnaataanersut. Tassa oqarsinnaavugut ileqqoq naliginnaasuuvoq, politiinut orniguttussanut ornitassaat pillugu nassuiaanneqartarnerat. Takusinnaavarali uani pisumi taamaaliornissaq pisariaqarpallaarsimanngitsoq, unittarfiummi eqqaani nunami nalasut amerlavallaarsimanavianngimmata, KNR-imut oqarpoq.
Politiinspektør: Imaanngilaq kalaaliummat qisuariaateqanngitsugut
114-iminut sianernertoqarnerata kingorna pinartoqartillugu kalerriisarfiup politiit sumiiffimmut orniguteqqusimavai, piffissaqalerunik. Tamatuma nalaani inuit saneqquasut arlallit 112-imut siarngupput, tassa Region Hovedstadenip pinartoqartillugu kalerriisarfianut, taakku ambulancenik isumaginnittuupput.
Politiilli aatsaat 45 minuttit qaangiuttut takkupput, aatsaallu tamatuma kingorna ambulancemik takkuttoqarluni. Taamaalineranili kingusinaareerput. Angut illoqannginnersami Amagerbro Torv-mi nunami nalalluni toquvoq.
Region Hovedstaden ambulancit isumagisaraat, taakkulu pisup kinguninngua utoqqatsertut; Københavnip Politiivisa aalajangiusimavaat 114-imut sianertoqaqqaarneraniit pisut pissusissamisut ingerlasimasut.
- Sianerfigineqarpugut. Apeqqutigaarpullu kalaaliunersoq, tamannalu ilumoorpoq. Aalajangerpugullumi politiinik ornigutitsiniarluta. Imaanngilarli paasigatsigu kalaaliusoq qisuariaateqanngitsoortugut, tassami orninneqarpoq, Peter Dahl KNR-imut oqarpoq.
