Københavnimi kalaallit angerlarsimaffeqanngitsut juullisioqatigiissinniarai

- Uagut kalaallit allanik ikiuerusuttupilussuusarpugut.

Poul Johansen, Aasianni peroriartortoq Danmarkimilu ukiuni kingullerni 38-ni najugaqartoq taama oqarpoq.

Taanna kalaallit Næstvedimi peqatigiiffianni Arsarnerini aningaaserisuuvoq, Danmarkimilu kalaallit inooqataanikkut ajornartorsiortut juullisioqatissaqanngitsut katersornissaannik ukiorpassuarni eqqarsaatigisarsimavaa.

- Københavnimiittut ingerlalluarpallaanngitsut akulikitsumik takusarpakka, aamma ikiorusullugit immaqalu juullisioqatiginiarlugit arlaleriaqalunga eqqarsaatigisarpara, Poul Johansen Sjællandip kujataani najugaqartoq taama oqarpoq.

Poul Johansen isumaqarpoq kalaallit Danmarkimiittut ingerlalluartut nunaqqatitik atugarliortut ikiortariaqaraluaraat.

- Isumagineqarnerat aamma malugisariaqarparput, aamma isumaginninnikkut sullissiviit tassatuaasariaqanngillat taakkuninnga isumaginnittuusut. Kalaallit Danmarkimi najugaqavissut aamma taamaaliorsinnaapput.

Kalaallinut angerlarsimaffeqanngitsunut inooqataanikkullu ajornarsiortunut

Taamaammat Poul Johansenip eqqarsaatini timitalertussanngorpai Københavnimilu Kalaallit Illuutaanni Løvstrædemiittumi decembarip 24-ani juullimi nereqatigiinnissamut qaaqqusilluni.

Kikkulluunniit tikilluaqqusaapput. Eqqarsaatiginerusaali tassaapput:

- Københavnimi kalaallit angerlarsimaffeqanngitsut allallu pissakitsuusut. Juullimi tunissutissanik akisuunik pisinissaminnut periarfissaqanngitsut imaluunniit ulloq taanna nerisassaminnut akissaqanngitsut pivakka. Aamma tassaasinnaapput inuit ilaqutaratik kisimiittuusut. Taakku eqqarsaatigaakka.

Københavnimi Kalaallit Illuutaat juullimi nerisassanik tunissuteqartuuvoq, aammali kalaallit peqatigiiffii arlallit aaqqissuussinermut tunissuteqarsimapput.

Aaqqissuussinermut peqataaniarluni nalunaaqqaarnissaq pisariaqanngilaq. Takkutiinnartoqarsinnaavoq. Tamannalu ajornartorsiutitaqarsinnaasoq Poul Johansenip nassuerutigaa. Naakkittartulli inissaqartitsisarput.

- Amerlasuupilussuarnik takkuttoqarnissaa ilaasa ernumassutigilaarpaat. Allallu oqarput 30-ussagunartugut allallu inersuaq inunnik ulikkaassasoraat. Tamannali misigisassatut akueriinnartariaqarparput. Ilimagaara susoqarneranik alakkarteralutik unnuup ingerlanerani takkussuutilissasut, Poul Johansen oqarpoq.

Aaqqissuussineq pissaaq Københavnimi Kalaallit Illuutaanni Løvstrædemi decembarip 24-ani nal. 16 - 21.