VIDEO Juullimut ammartakkami ataqqinninneq sammineqassaaq
Taamalilluni juullimut ammartagaq minutsinik tallimanik sivisussuseqartoq juullip qaammataani KNR-TV-kkut malinnaaffigineqarsinnaassaaq.
Ammartakkami ataqqinninnerup ujartornissaa Rosa Olsenip pisariaqarsoraa.
- Angalasarnikuuninni takusartakkakka tassa, annertulaartorujussuarmik ataqqinninneq peeriartornera malugisimagakku. Taamaalillunga julekanlenderimik ataqqinninnermut tunngassutilimmik tulluarsoralugu taanna toqqarsimavara, Rosa Olsen KNR-imut oqarpoq.
Rosa Olsenip juullilernerani aliikkutassiatut isiginnaagassiaaqqanik suliaqarnermini Agathe Lyberth suleqatigaa. Isiginnaagassiami nissiaqqat pingasut pingaarnerpaatut inuttaapput.
- Tassa sapinngisannguamik taakkua nissiaqqat pingasut ujarlertassapput ataqqinninnermik suliffeqarfinnut, politikerinut, politiinut, inuinnarnut, biilertartunut, inuinnarnut aqqusinermi naapittakkagut taakkununnga ujassavaat ataqqinninneq sumiinnersoq, Rosa Olsen KNR-imut oqarpoq.
Aallakaatitassiami inuusuttut isiginnaartitsinermik sungiusartut ataqqinninneq pillugu isiginnaartitsissapput. Juulli suli ungasiaraluartoq piffissaq aggersoq ulapittussanngorput.