Juullimut allakkatit nassiutereerpigit?
Juullimut pilluaqqussutit poortukkallu juullertinnagu angallanneqaleruttorput. Nunatta isorartunerujussuaq silallu peqqarniissinnaasarnera pissutigalugit poortukkat allakkallu amerlasuut piffissap sivikitsup ingerlanerani apuuniarnerat imaannaanngissinnaasarpoq.
Illoqqortoormiunut Tasiilamullu nassiussassat decembarip qulingiluaat aqqaneq aappaallu tunniutereersimasussaapput. Kitaanilu illoqarfinni arlalinni tunniussinissamut periarfissaq kingulleq tassaavoq ullumi sumiiffiillu ilaanni aqagu, Tele Post KNR-imut taama ilisimatitsivoq.
Nassiussinissamut piffissaliunneqartut paasiniarsinnaavatit najukkanni allakkerivimmut paasiniaanikkut tassani aamma paasisinnaassavat poortukkat allakkallu utaqqisatit piffissaagallartillugu nassiunneqarsimanersut.
Air Greenlandip immikkut timmisartuussineri ullumi aallartissapput immikkullu timmisartuusseqattaarnerit decembarip 21-ata tungaanut ingerlanneqassapput ilaasut nassiussallu juullertinnagu apuunniarlugit.
Royal Arctic Linep assartuutaa Irena Arctica ippassaq Nanortalimmi usigiartilluni nangitippoq. Umiarsuup taassuma krania ajoquteqalersimavoq ajoqutaalu Nanortalimmi kingoraartissaqarani. Taamaammat ussigiarneq unitsinneqartariaqarsimavoq.
Illoqarfinnut allanut nassiussat kinguaattoornissaat aarlerinarsissagaluarpoq Irena Arcticap atortup kingoraartissai Nuummiit nassiuteqqaarneqartussat utaqqiinnarsimasuuppagit. Taamaammat umiarsuaq Nuummut ingerlaqqippoq tassani iluarsaanneqareeruni illoqarfiit ornitassani tikissallugit. Royal Arctic Line nalunaarpoq Nanortalimmut nassiussat juullertinnagu apuunneqarumaartut umiarsuaq Aalborgiliarluni Nanortalimmut aqqusaaqqippat.
