Juullimili akissarsipput kommunimiillu ikiorneqarsinnaanngillat
Tunisassiorfiup ukiuunerani tunissasiornera unitsinneqarmalli ulluinnarni aqutsisoqanngilaq nutaamillu suli aqutsisoqalerani.
Tunisassiorfimmi sulisut marluk Kunuunguaq Heilmann aamma Niels Rasmussen KNR-imit oqaloqatigineqarput.
- Nerisassanut kiassarnissamullu orsussanut akissaqanngilagut, tamanna ajorluinnarpoq, Niels Rasmussen oqarpoq.
Januaarip aappaanili akissarsianik kommunimiillu ikiorsiissutinik tunineqarsimanngillat. Qaasuitsup kommunianit aningaasanik atukkerneqarpoq nerisassanut kiassarnermullu orusussamut atugassanik.
- Nunaqarfimmi arnaateqarpunga taannalu atuarfimmi atuartuuvoq pisariaqarporlu aamma taassuma nerisaqarnissaa, Niels Rasmussen KNR-imut oqarpoq.
KNT-mi akisussaaffimmik tigusisoqanngilaq
Niels Rasmussen tunisassiorfimmilu KNT-mi sulisut, tunisassiorfimmi Kalaallit Nunaanni Tunisassiorfimmi aqutsisunit atsiornermik amigaateqarput.
Atsiorneq taanna kommunimut uppernarsaatitut atorneqartussaavoq, tunisassiorfiup ukiuunerani matoqqanera pillugu. Kisiannili tassa tunisassiorfimmi akisussaasoqanngilaq pisortaqaraniluunniit, KNT-mi siulersuisuni siulittaasunngorlaaq Jakob Kruse Uummannaq KNR-imut taama oqarpoq.
Jakob Kruse tunisassiorfiup siulersuisuini siulittaasunngornissamut kaammattorneqarami akuersivoq.
Tunisassiorfiup inissisimanera misissorlugu maanna aallartippoq aamma pisortamik akisussaamilluunniit pissarsiornissamut periarfissanik misissuilluni.
Ajunngitsorsiassanik pissarsinngitsoortut
Niels Rasmussen suleqatinilu Kunuunnguaq Heilmann, tamarmik Nuummit aallarlutik Niaqornani tunisassiorfimmi sulilernissaannik siorna neqeroorfigineqarput, tunisassiornerlu ingerlalluarsimavoq sikunerata kingorna aalisarneq piniarnerlu qanittumi uninnissaata tungaanut.
Kunuunnguup nunaqarfimmi suleqatai ajunngitsorsiassanik 10.000 koruuninik tunineqarput, taamaattorli Kunuunnguaq Heilmann Niels Rasmussenilu Niaqornanut nuussimasutut nalunaarsimanngimmata ajunngitsorsiassanik tunineqanngillat.
"Pappilissat uannut nassiutissavaat"
Mikael Petersen, Siumup siulittaasuata tulliata aappaa, tunisassiorfiup KNT-ip aallartisarneqarnissaanut suliniuteqartut pingaarnerit ilaat, piginneqataasorpassuarnut ilaavoq.
Taassuma nassuiarpaa tunisassiorfimmi aqutsisuugallartunut ilaalluni, suliffeqarfiup allap Kitaa Seafoodip Nuummiittup Niaqornani tunisassiorfik ingerlatsilersinnaanissaata tungaanut.
Kitaa Seafood, Niaqornani tunisassiorfimmik tigusisussatut naatsorsuutigineqartup pisortaata Robert Møllerip oqaatigaa, KNT-ip ingerlanneqarnissaanut suli isumaqatigiissuteqartoqanngimmat, tunisassiorfiup ukiuunerani matoqqanera pillugu kommunimut atugassanik uppernarsaatinik atsiorsinnaanani.
Aalisarnermut Naalakkersuisoq Karl Kristian Kruse (S) KNT-mi piginneqataasutut decembarimi 2014-imi tunuarpoq.
