Juullimi inuulluaqqussut Aalborgimi ukioq manna immiunneqassaaq
Nunatsinnut juullimi inuulluaqqusinermi ukioq manna aqutsisussat tassaapput Timm Vladimir aamma Maria Motzfeldt. Musikkens Hus i Aalborg nittartakkamini taama allaaserisaqarpoq.
Nunatsinnut juullimi inuulluaqqussut DR-ip aallakaatitassiaasa pisoqaanerit ilagaat, ukioq mannalu Aalborgimi Musikkens Husimi ingerlanneqassalluni.
Juullimi inuulluaqqusineq arfininngornermi decembarip pingajuani immiunneqassaaq juullilu sapaatit-akunneranik sioqqullugu DR1-kkut aallakaatinneqassalluni.
Nunatsinnut juullimi inuulluaqqusineq Danmarkip Radioata 1932-mili aallakaatittalerpaa.
Timm Vladimir inersuarmi aqutsisuussaaq Nunatsinnullu tikeraarnermi Maria Motzfeldt aqutsisuussalluni. Unnuk tupaallannartunik imaqartinneqassaaq, Nunatsinnit oqaluttuanik oqaluttuartoqassalluni kiisalu nipilersortut arlallit aliikkusersuissallutik.
Kalaallit erinarsoqatigiit Ikinngutigiit erinarsussapput, Julie Berthelsen tusarnaartitsissaaq nipilersoqatigiillu Small Time Giants aamma nipilersussallutik.
Isissutissanik tuniniaaneq ullumi oktobarip 28-iani Danmarkimi nalunaaqutaq malillugu nal. 12.00 aallartippoq. Isissutissat nittartakkami uani pisiarineqarsinnaapput.