Juulimaat: Juulimaaq Kalaallit Nunaanneerpoq

Ukiormanna juulimaat ataatsimeersuarmata Finlandi peqataatitaqanngilaq. Taamaattumik annerusumik assortuussutigineqanngitsumik Kalaallit Nunaata juulimaava juulimaaviusoq isumaqatigiissutigineqarpoq.
juulip 20-at 2010 07:47

Nutarterpoq 20.07.10 nalunaaqutaq: 10:43

Ippassaq juulimaat 120-it nunarsuarmi tamarmeersut Københavnimi 53-issaanik ataatsimeersuarput. Taama tv2.dk allappoq. Juulimaat nissiaqqallu ungasissorsuarmeersut, soorlu USA, Canada aamma Japan ataatsimeersuarnermi peqataapput.

Aammaarlutik juulimaat isumaqatigiissutiginiartussaavaat juulimaaq ilumoortoq nunarsuup suatungaaneersuunersoq. Ukiullu siuliini Finlandi akerliusarsimasoq ukiormanna akerliusoqanngitsumik isumaqatigiissutigineqarpoq Kalaallit Nunaanneersoq. Ataatsimeersuarnermi siulittaasoq, Jens Peder Tornvig tv2.dk-imut oqarpoq.

Tamannalu peqquteqarpoq Finlandimiut juulimaavata ataatsimeersuarneq akerliulluni peqataaffigiumanngimmagu, finlandimiummi uteriillutik nunartik juulimaap angerlarsimaffigigaa suli isumaqarmata. Taama finlandimiut tv-kkut nutaarsiassaqartitsiviat YLE nalunaarpoq.

Taamaattorli juullip ulluata inissinnissaa ajornakusoorsimavoq. Amerlanerussuteqartut isumaqarsimapput 24. decemberiusoq, ikinnerussuteqartullu 25. decemberiunerarsimagaat, russillu juulimaavata juulli januaarip arfernganiunerarlugu aaliangiusimasimavaa.