Justus Hansenip taaseqataanini uggoraa

Taamasilluni qinikkatut atorfii marluk imminnut kalluarput.

Taaseqataagavit ugguarpit?

- Aap, ugguarpunga. Kingorna sinilluanngilanga, Jusus Hansen oqarpoq. Kommuneqarfik Sermersuumi Kommunalbestyrelsimi ilaasortaautigaluni Inatsisartuni ilaasortaavoq. 

Justus Hansen nammineq oqarneratut Kommunerqarfik Sermersooq 45 millioninik kommuninut allanut pilliuteqarnerusussanngorpoq. Inatsisartuni ilaasortutut taaseqataanermi kingorna eqqarsaatersuutigisimavaa.

- Inatsisartuni ilaasortatut ataatsimiittarfimmi issiavunga nalimmassaanermullu aaqqissuusseqqinnermut akuerseqataallunga taaseqataallunga. Kingornalu tamanna ajuusaarutigaara. Imminut aperaanga sooq taaseqataanngiinnarsimannginnersunga. Tassami kommunera aamma illersortussaagaluarpara, Justus Hansen qinikkatut atorfini kalluarneri pillugu ippassaq Qanoruumut oqarpoq.

Justus Hansenip, Demokraatineersup, Kommuneqarfik Sermersuumi Inuit Ataqatigiit suleqatigai. Taanalu aperineqarami Borgmesteri, Asii Chemnitz Narupi, Justus Hansenip iliuusai kamaammersutigisimanerai ima akivoq:

- Naamik kamanngilaq. Asii tulluusimaartuuvoq kommunerpullu pillugu tamaviaarluni sulisoq. Aamma nalunngilaa politikkimi pissutit qanoq ittuunersut. Oqarfigaara pisoq ilinniarfisimallugu, Justus Hansen oqaluttuarpoq.

Taassuma Demokraatit siulittaasuat aningaasaqarnermut naalakkersuisuunera neriuuteqarfigalugulu tuppallersuutigaa.

- Pisut akueriinnartariaqarpagut tassanngaanniillu pitsaanerpaamik anguniagaqarluta. Uanga nuannaarutigaara siulittaasorput Andreas Uldum aningaasaqarnermut naalakkersuisuummat. Taassuma nalimmassaanermut isumaqatigiinniarnerit tigummisussaavai, taamaammat suliat takoriaannaanissai kiisalu naapertuilluartumik nalimmassaasoqartalernissaa, Justus Hansen oqarpoq.