Justus Hansen: USA Pituffimmut akiliuteqassaaq
Nunanut allanut sillimanarnermullu ataatsimiititaliaq taama piumasaqaateqarpoq, taakkualu Nunarput Danmarkilu USA-mut iillersornissamut isumaqatigiissummik nutaamik isumaqatigiinninniaqquai.
USA-p naalagaaffeqatigiillu illersornissamut isumaqatigiissutaat 1951-imeersoq pisoqalisoq, Inatsisartuni nunanut allanut sillimaniarnermullu ataatsimiitsimiititaliaq isumaqarpoq, USA-llu sakkutooqarfigisimasamini saliinissaanik pisussaaffiliisumik nutaamik isumaqatigiissusiornissaq piumasaralugu.
- Ullutsinnut naleqqutinngilaq. Nunami allami sakkutooqarfigisami - aamma nunatsinni - qimatanut akisussaassuseq tigusariaqaraat isumaqarpugut. Soorlu oqartuartugut, mingutsitsisoq akiliissaaq, ataatsimiititaliami siulittaasoq, Justus Hansen oqarpoq.
Pituffimmiinnermut akiliut
USA-p nunatsinniisitsineranut ilaatigut Pituffimmut akiliuteqarneratigut nunarput iluanaaruteqarnerusariaqartoq, ataatsimiititaliap sapaatip akunnerata siuliani Washington D.C-miinneramini amerikamiorpassuarnut qaffasissumi atorfilinnut erseqqissarpaa.
- Nunatsinnimi nunaminermik atuiermut akiliisariaqarput.
Nunattalu nunarsuarmi inissiffisimaffini sunniuteqaatiginerusariaqaraa, Justus Hansen isumaqarpoq.
Tamannalumi ajornarluinnanngilaq, USA-mi Issittumut soqutiginninneruleraluttuinnarpoq.
Ataatsimiititaliamiillu USA-mi atorfilissuarnik toqqaannartumik oqaloqateqarnera anguaqarfiunerussaaq.
- Nunat marluk qaffasissumik atorfilittaasa oqaloqatigiinnerannit taamaaliornerput angusaqarfiunerussasoq isumaqavippunga. Nunatta politikkikkut siutttui takkullutik piumasaqaatiminnik saqqummiussimmata isumaqartinneqarnerussasoraara. Ilumoorussinerusutut isigissavaatigut.
Nutaamik isumaqatigiinniuteqarnissaq itigartitsissutigineqarnikuuvoq
Illersornissamut isumaqatigiissut USA-mut qanittumi isumaqatigiinniutigineqarnissaa, danskit nunanut allanut tungasunut ministeriata upernaaq itigartitsissutigaa. Taamaakkaluartorli suliassaq pimoorunnerullugu maannakkut suliarisariasariaqaraa, Justus Hansenip oqaatigaa.
- Danskit nunanut allanut tunngasunut ministeriata suliassaq una pimoorunnerulissagaa neriuppunga. Tassa aallariarfiat. Oqariartuuteqarnerpullu ilumoorutinngippassuk uagut nipitunerusumik oqalussaagut.
Illersornissamut USA-mut nutaamik isumaqatigiissusiornissaq nunanut allanut tunngasunut naalakkersuisup Vittus Qujaukitsup taperseraa Inatsisartuni nunanut allanut sillimaniarnermullu tunngasunut ataatsimiititaliaq aamma allapput.