Julie Berthelsenip atuagaq pinerluttulersaarut atuffassissutitut immiukkaa

Atuagaq ’Frosne Beviser’ siorna saqqummersinneqarmat Danmarkimi pinerluttulersaarutinik atuakkiortut peqatigiiffiata, Det Danske Kriminalakademip, pinerluttulersaarummik siullermeertumik atuakkiortumut nersornaasiuttagaanik tunineqarpoq.

Nina von Staffeldtillu atuakkiaa atuffassissutitut Julie Berthelsenimit immiunneqarpoq atuakkamilu oqaluttuaq Sisimiuni Nuummilu pisimasuutinneqartoq allaanerusumik tusarsinnaanngorparput, atuakkanik naqiterisitsisarfik Lindhardt og Ringhof atuffassissummik saqqummersitseqqammersoq taama allappoq.

- Pinerluttulersaarutit nuannareqaakka, Kalaallit Nunaannilu pisimasuutinneqartoq atuarlugu assut nuannerpoq. Sikap ’nammineq angalanera’ atuarlugu pissanganarpoq misigissuserpassuarnillu qaffakaatitsilluni. Sumiiffinnut marlunnut ataneq avissaaqqasutullu misigisimaneq ilisarnartupilussuupput, Julie Berthelsen taama oqarpoq.

Atuakkami ’Frosne Beviser’-imi nanginneranilu ’Den Sorte Engel’-imi ukioq manna saqqummersinneqartumi pingaarnertut inuttaasoq tassaavoq Sika Haslund - suliffeqarfimmi ’Go Greenland’-imi sulilerlaaq Danmarkimilu ukiuni arlalinni ilinniareerluni najugaqareerlunilu Nunatsinnut utertoq.