Julie Berthelsen radiomi aallakaatitsisartunngulersoq
’Formiddag på 4’eren’-imi ullormut tusarnaartartut 700.000-t missaanniittut erinarsaortartup Julie Berthelsenip nipaa marsip aallaqqaataaniit ullaap tungaani tusaasalissavaat. Julie Berthelsenimi ukiorpassuarni aallakaatitsisartoq Kasper Harboe peqatigalugu aallakaatitsisalissaaq.
’Formiddag på 4’eren’ aliikkutassiaavoq soqutiginartunik pulaartoqarluni massakkullu pisunik sammisaqartartoq. Oqallisissat angisuut mikisullu sammineqartarput, Julie Berthelsenilu suliffimmut tassunga tulluutissagunarpoq.
DR Danmarkimi aaqqissuisoqarfimmi pisortaq, Tina Kragelund, Julie Berthelsen pillugu kusanartunik oqaaseqarpoq.
- Julie Berthelseni arnaavoq paasinnillaqqissoq pimoorussillaqqissorlu, avatangiisiminullu soqutiginnittoq. Radiukkoortalernissaa tusarnaartartut qilanaarisinnaavaat, Tina Kragelund oqarpoq.
AAMMA ATUARUK Julie Berthelsen singlemik nutaamik saqqummersitsisoq
TV-miit radiomut
Julie Berthelsen 1999-imiit ukiut 15-t DR1-ip juullimi Kalaallit Nunaannut inuulluaqqussutaani ilisarititsisuusarpoq, taassuma saniatigut TV2-mi aamma suliaqartarnikuulluni. Maannalu tassa radiomi aallakaatitsisartunngulerpoq.
- Nutaauvoq pissanganarlunilu. Erinersortartuuninnut assingulaarsinnaagaluartoq aallakaatitsisarnissaq uannut nutaauvoq. Ilikkagaqarnissannut nutaanillu suleqateqalernissannut qilanaarpunga, Julie Berthelsen DR.dk-mut oqarpoq.