Juliane: Urani pillugu paasisaqarnerorusuppugut

Paasisassarsiorluni angalanermi, Inatsisartut Aatsitassanut Ataatsimiititaliaat ilisimatinneqarsimanngilaq qaaqquneqarnanilu.
Assi © : Inuit Ataqatigiit
juulip 06-at 2015 14:48
Nutserisoq Apollo Jeremiassen

Inatsisartunut ilaasortaq Juliane Henningsen Inuit Ataqatigiit, Inatsisartut Aatsitassanut Ataatsimiititaliaani aamma ilaasortaasoq, ilaatinneqannginnertik tupigalugu §37 naapertorlugu Naalakkersuisumut Vittus Qujaukitsumut apeqquteqarpoq.

Canadamut paasisassarsiorluni angalanermi paasissallugu pingaartinneqarpoq, Canadamiut uranisiornerminni suut misilittagarineraat, taassumalu iluani malittarisassaliornerit, minnerunngitsumillu aatsitassarsiornerup pinngortitamut inuiaqatigiinnilu aningaasaqarnikkut tamassumunnga sunniutaasinnaasut kingunerisinnaasaallu itinerusumik paasisaqarfigissallugit.

Aamma atuaruk Qujaukitsoq: Inissaaleqisoqarnera pissutaalluni tusagassiortunik peqataasoqanngilaq

- Ataatsimiititaliaq uranimut tunngassuteqartunik apeqquterpassuarnik nassiusseqqammerpoq, ilimasaarutaanikuummat ukiassamut inatsisissat aammalu konventionit nunat tamalaat akornanni isumaqatigiissutit arlalissuit atuutsilernissaat maani Nunatsinni uranisiornissaq anguniarlugu, Inatsisartut Aatsitassanut Ataatsimiititaliaanni ilaasortaq Juliane Henningsen (IA) oqarpoq.

Naalakkersuisumut apeqqutaa

Naalakkersuisunullu apeqquteqarnini ilaatigut itisilerlugu tusagassiuutinut nalunaarummini ima allappoq:

- Paasisassarsiorluni angalaneq aamma tassaavoq, uranimik aatsitassarsiornerup ingerlaneranik pineqartut aqunneqarnerinik minnerunngitsumillu, taamatut aatsitassarsiornerit ingerlanneqarnerini avatangiisinut inuiaqatigiinnilu aningaasaqarnikkut sunniutaasinnaasut kingunerisinnaasaalu itinerusumik paasisaqarfigerusunneqarneri, Juliane Henningsen allappoq, KNR-imullu ima oqarluni.

Aamma atuaruk Uran pillugu Danmarkilu isumaqatigiissusiornissaq qanilliartorpoq

- Findlandimut angalalerutta paasiniartussaavarput aamma innuttaasut, kattuffiit, akerliusut sooq akerliunersut aammalu sulianik taamaattunik ingerlatisimasut qanoq misilittagarnersut, naak uranimut naaggaartuulluta ilisimasassanik katersinissaq pingaartipparput. Juliane Henningsen oqarpoq.

Ataatsimiititaliaq ilaatinneqanngilaq

Inatsisartut Aatsitassanut Ataatsimiititaliaa, Canadamut paasisassarsiorluni angalasoqarnerani sooq ilaserineqarsimanngitsoq, Juliane Henningsenip paasisinnaanngilaa.

Aamma atuaruk Illuinnaasiortumik paasititsiniaasoqartarnera Krarupip eqqarsarnartoqartippaa

- Tassa qanorsuaq paasiniaakuttoorsinnaapput, kisianni puigorneqassanngilaq Inatsisartut aatsitassanut ataatsimiititaliaqarput, aammalu uagut tassani ilaasortaasugut aatsitassanut urannimullu tunngasuni pisunut tamanut malinnaasussaatitaavugut, Inatsisartut Aatsitassanut Ataatsimiititaliaannilu ilaasortaq, Juliane Henningsen Inuit Ataqatigiinniit oqarpoq.

Kuannersuarni pilersaarusiamut qinnuteqartoqarnissaa apeqqarissaarfigineqarnissaalu ukiup tulliani ilimagimagineqarpoq.

Aamma atuaruk Katuami oqallitsitsineq: Eqqumiitsuliorneq aatsitassarsiornerlu

Aamma atuaruk Naalakkersuisut ammasumik pissuseqarnissartik puigoqqippaat