Johan Lund Olsenip Pituffik pillugu ataatsimeeqataaqqusaannginnini uumitsaatigigaa

- Nunanut allanut tunngasunut ministerip Pituffik pillugu ataatsimiigiaqqusinermini, Kalaallit Nunaannit ilaasortaasugut piaaraluni peqataatinngimmatigut narrutsassimaarutigivara, John Lund Olsen tusagassiuutinut nalunaarummini ilaatigut taama allaaserisaqarpoq.
 
Pituffik pillugu Nunanut allanut tunngasunut ministereqarfimmut ataatsimiigiaqqusissutit Martin Lidegaardip ippassaani ataasinngornermi ualikkut nassiussuuppai, ippassarlu ataatsimiittoqarnissaanut qaaqqusilluni, Kalaallit Nunaat pillugu Ataatsimiititaliami oqaaseqartartunut nassiussuunneqarlutik, Folketingimi kalaallit oqaaseqartartui kisiisa pinnagit. Johan Lund Olsenillu tamanna naammaginngeqaa:
 
- Ilumoorsinnaanngivippoq, Pituffik - Kalaallit Nunaannut taama pingaaruteqarluinnartigisoq - pillugu suliassaq oqallisigineqassappat, kalaallit qinikkat piaaraluni peqataatinnagit. Tassami maani danskit parlamentianni suliassatta ilarpiaat tassaavoq: Kalaallit Nunaannut tunngassuteqartut suulluunniit pisariaqartumik maluginiarneqarnissaasa qularnaarnissaat, Johan Lund Olsen tusagassiuutinut nalunaarummini allappoq, Kalaallit Nunaallu pillugu Ataatsimiititaliami siulittaasuunini eqqaasitsissutigalugu.
 
Pituffik pillugu ataatsimiinnermut aggersarneqarsimannginnini taassuma paasisinnaanngilaa, ministerillu tamatumunnga atatillugu nassuiaateqarnissaa noqqaassutigalugu.
 
Martin Lidegaardip  ataatsimeereernerup kingorna ilisimatitsissuteqarumaarluni Johan Lund Olsenimut nalunaarutiginikuuaa.