Johan Lund Olsen Jonathan Jakobsenilu nersornaaserneqarput
- Nunatsinni politikikkut oqaluttuarisaaneq ilisimavat, nalunngilallu tunniussisoqartarlunilu pissarsisoqartartoq. Kommunalbestyrelsinngorninnit ukiut 26-t qaangiutereeraluartut inuiaqatigiit sullinnissaannut kajumissuseerutinngisaannarsimavutit. Taamaalillutit nunatsinni inuiaqatigiinnik ineriartortitseqataasimavutit, tamannalu pillugu Inatsisartut siulittaasoqarfiata qujaffigiumavaatit, Inatsisartut siulittaasuat Lars-Emil Johansen Johan Lund Olsenimut oqalugiaammini ilaatigut taama oqarpoq.
Jonathan Jakobsen aamma nersornaaserneqarpoq
Inuiaqatigiit ineriartortinneqarnissaannut sunniuteqaqataarusunnerlu aamma tunngavilersuutigalugit - Jonathan Jakobsen aamma Nersornaammik siilviusumik nersornaaserneqarpoq.
Jonathan Jakobsen KNI-mi ukiut 50-it sinnerlugit sulisimanini pillugu Nersornaammik saqqarmiulerneqarpoq.
Tamatumunnga peqatigitillugu maanna ukiuni 40-nngulersuni najukkami qinikkatut sulisimavoq, maannalu Qeqertarsuatsiaanut Kapisilinnullu nunaqarfinni aqutsisuni siulittaasuuluni.
- Ukiuni taama amerlatigisuni naalakkersuinermik ilittulli ingerlataqarsimasut amerlanngillat, taamaattumillu avatangiisivit ilinnut tatiginnilluinnarnerattut tamanna siulittaasoqarfimmit isigineqarpoq, Lars-Emil Johansen oqalugiaammini ilaatigut taama oqarpoq.
Nersornaaserneqartut marluk Hans Egedep illuani nalliuttorsiualaarnermi saqqarmiulerneqarput.
