VIDEO Jess Svanep MIOp isornartorsiuinera akerlilerpaa
Meeqqat kaattut, pnnguartarfiit ulorianarluinnartut kinguaassiutitigullu atornerluinerit, tassa meeqqat illersuisuata Aviâja Egede Lyngep meeqqallu siunnersuisuata Ellen Bang Bourupip Qaasuitsup Kommuniani angalaarnerminni paasisaat.
- Toqqaannartumik oqaatigissagaanni, Qaasuitsup Kommuniani ajoraluartumik, meeqqat pisinnaatitaaffiinik unioqqutitsineq annertuumik misigaarput takullugulu, meeqqat illersuisuat Aviâja Egede Lynge tallimanngormat Qanoruumut taama oqarpoq.
Kommunimut toqqaannartumik saaffiginnigitsi
Borgmesterip tulliata siulliup Jess Svanep (S) isornartorsiuineq ilisarinngilaa.
- Tupaallannarpoq taamak sakkortutigisumik tusagassiutitigut meeqqat illersuisuaninngaanniit oqaaseqartartuaningaanniit nalunaarut takullugu.
- Tassami oqaatigineqarpoq nalunaarutaasarsimagaluit qisuariarfigineqarneq ajortut, kisianni oqaatigissuara ukioq manna upernassap tungaanut MIO aqqutigalugu saaffiginninneq ataaseq uagutsinnut apuussimavoq, taannalu uagutsinnut adresseqanngitsoq aamma kingorna paasisimallugu
- Isumaqarpunga nammineq angalasimanermini meeqqat illersuisuata oqaaseqartartuatalu takusimasani, aamma pissuserissaartumik, annerusumik iliuuseqarnissarput siunertaralugu toqqarluta saaffigisariaqaraluaraatigut, Jess Svane oqarpoq.
Aamma atuaruk Meeqqat Illersuisuat: Meeqqat pisinnaatitaaffii unioqqutitsinneqarput
Pitsaanerulerusullutik suliaqartuarput
Borgmesterip tulliata siulliup takussutissanik pitinnani pissutsit piviusut isornartorsiutigineqartullu qanoq imminnut atatigineri takusinnaanngilaa.
- Sumiginnaanermik taaneqarpoq, toqqaannartumik taamak oqanngilanga. Oqassuunga uagut angalasartoqarpugut Qaasuitsup Kommuniani nalunaarutigineqartut piaarnerpaamik sukkanerpaamik iliuuseqarfigisarpavut. Massakkumullu meeqqat piginnaatitaaffi ima sakkortutigisumik iliuuseqarfigisarpagut siusinnerusukkut aamma uparuarneqarnikuugatta.
- Ajoraluartumik meeqqat 100-t sinnerlugit angerlarsimaffiup avataani massakkut inissisimapput. Tassa oqartoqarsinnaanngilaq iliuuseqanngitsugut, Jess Svane oqarpoq.
Qaasuitsup Kommuniani meeqqat pisinnaatitaaffii pillugit suliaqarnini annertusiartortuarpaa. Pitsaaliuinerullu ataani illoqarfiit tamarmik ataatsimiititaliamik pilersitsivigineqarsimapput, inuit namminneq ippigisaminnik kommunimut oqaaseqarsinnaaniassammata, taamaalillunilu kommunimi suliaq ingerlalersinnaalluni, borgmesterip tullia siulleq nassuiaavoq.
Meeqqat illersuisuata Aviâja Egede Lyngep meeqqallu siunnersuisuata Ellen Bang Bourupip Qaasuitsup Kommuniani pissutsit pillugit oqaluttuaat uani ataani takusinnaavat:
