Jess Svane avannaani borgmesterinngussaaq
Siumumeersoq Jess Svane Qasigiarmiu, Avannaata kommunissaani borgmesterinngussaaq, Atassummeersorlu Timooq Mølgaard Qeqertarsuarmiu borgmesterip tulliatut siullertut inississalluni.
Allattoq Louise M. Kleemann
Borgmesterip aappaa kinaassanersoq kingusinnerusukkut aalajangiiffigineqassaaq.
Oqarasuaatikkut ullumi ataatsimiittoqarnerani taama aalajangiisoqarpoq. Ataatsimiinneq Aasianni pisussaagaluarpoq, kisianni qinigaasinnaanermik naliliisartut suli aalajangersaatinnagit, oqarasuaatikkut ataatsimiinnissaq aalajangiunneqarsimavoq.
Ataatsimiinnermi Siumumit Atassummillu inuttalikkamik suligasuartussamik ataatsimiititaliamik, isumaqatigiissutissap ilusilersorluarnissaanik suliaqartussamik pilersitsisoqassasoq isumaqatigiissutigineqarpoq.