Jens B'p qarnga matoqqavoq
Nuup umiarsualivia pillugu Per Berthelsen marloqiammik attuumassuteqarpoq. Kommuneqarfik Sermersuumi kommunalbestyelsemut ilaasortaavoq aammalu Inatsisartuni ilaasortaalluni. Taakkuli tamaasa tunulequtigalugit apeqqutai suli attaveqarnermut naalakkersuisumit Jens B. Frederiksenimit akineqanngillat.
- Ataatsimiititaliami Jens B. Frederiksen isumasioqatigisimagaluarparput apeqqutivulli tassani akineqanngillat. Politikkikkut akisussaasumit akineqarsinnaanani uuminarpoq ilioriusissaaleqinarlunilu. Ukiut qulit kingulliit tamanna oqallisigineqarpoq suleqatigiissitanik pilersitsisoqartarsimalluni, maannamulli sumininnguamilluunniit soriartoqanngilaq. Asuli piffissaajaatigiinnartalerpara Nuup umiarsualivia pillugu Jens B. Frederiksenimik oqaloqateqariartarnera, Per Berthelsen KNR-mut oqarpoq.
Pilersaarutit siulliit malillugit umiarsualivik aktietilinnit pigineqartussaagaluarpoq. Piginneqataasut pingasuusut affaat Namminersorlutik Oqartussat pigissavaat affaalu Royal Arctic Linep aamma Aalborg Havn-ip aamma Kommuneqarfik Sermersuup pigissavaat. Maannali Namminersorlutik Oqartussat ilimanarsisippaat suliaq kisimik naammassiniarniarlugu.
- Neqeroorupput Namminersorlutik Oqartussanut tunniutereerparput akissutisinissarpullu utaqqiinnarparput. Peqaatinniarnata Namminersorlutik Oqartussat aalangersimagunik tamanna nammineq akisussaaffigaat. Namminersorlutik Oqartussat akissutissaat utaqqiinnarparput, Aalborg Havnimi pisortaaneq Claus Holstein oqarpoq.
Sapaatip akunnera kingullerli umiarsualiviup siunissaa pillugu Jens B. Frederiksen oqaaseqartinniarneqartarsimagaluarpoq. Taamaattoq maannamut tassa nipaqanngittuarsinnarpoq.
- Aktietileqatigiinnik pilersitsinissaq orniginartinnerugaluarpara Namminersorlutik Oqartussat kisimik akisussaassanngimmata. Isumaqarpunga kommunep namminersortullu piginneqataanissaat pitsaaqutitaqartoq. Tamannami tunngavigalugu aningaasartuutit eqqarsaatigalugit Namminersorlutik Oqartussat kisimik akisussaassanngillat. Pilersaarutaagaluarpormi atortut taakku isumagissagaat aningaasaliissutigalugillu taava uagut aningaasat nutaat 80 millioner koruunit pissarsiarinissaat isumagissagipput. Maanna killiffik eqqarsaatigalugu ilimagineruara Namminersorlutik Oqartussat akisussaaffik kisermaanniaraat, Per Berthelsen oqarpoq, erseqqissarpaalu aningaasaqarnermut ataatsimiititaliap ataatsiiinerinit nipangiussisussaatitaagami nammineq isummani taamaallaat saqqummiussinnaallugu.
