Japanip arfanniaqqusinnginneq malinnagu 177-it tulaakkai
Japanimi aalisarnermut ministereqarfiup paasissutissiissutigaa, arferit 177-it ukioq manna tulaanneqarsimasut. Nutaarsiassaqartitsivik dpa naapertorlugu tikaagulliit 43-t tikaagulliusaarnallu 134-t pineqarput.
Japanimit paasissutissiineq naapertorlugu piniarneq ilisimatusarnermut attuumassuteqartinneqartarpoq. Imarmiullu misissorneqareeraangamik nerisassianngorlugit tuniniarneqartarlutik.
Japanimiut umiarsuaataat pingasuupput.
Taakku juunimi aallannginnerminni arferit 177-it pisariniarlugit pilersaaruteqarlutik nalunaaruteqaqqaarsimapput.
Arferit manerassuup avannaata ilaani pisarineqarput.
Japanip nunat tamalaat akornanni ataatsimiititaliarsuarmi (IWC-mi) arfanniaqqusaannginnermut isumaqatigiissut atsiornikuuaa.
Arferillu ilisimatusarnermut siunertaqartumik pisarineqarsinnaanerat Isumaqatigiissummi tassani periarfissaritinneqarpoq.
Ilisimatusarneq ”pisariaqarpoq” taamaalilluta attanneqarsinnaasumik arfernik piniarsinnaaneq nalilersinnaavarput, arfernik niueqqilernissarput qilanaaraarput, Japanip aalisarnermut ministereqarfianeersoq, Kohei Ito nutaarsiassaqartitsivimmut AFP-mut taama oqarpoq.
Arfernik niuerneq taamaallaat Norgemi Islandimilu akuerisaavoq. Norgemi naalakkersuisut isumaqarrput IWC-mi 1986-imi isumaqatigiissummut pituttorsimanatik.
Japanimi arferit piumaneqarnerat ukiuni kingullerni appariangaatsiarsimavoq.
Taamaakkaluartorli japanimiut umiarsuaataasa arferpassuit ukiut tamaasa pisarisarpaat.
