Jakob Edvard Kuupik Kleist - kinaana?
Danmarkip Radiuaneersup Kirsten Rosingip, kalaaliusup, Danmarkip Radiuani Radioaviisimi ilisarititsinera ima kalaallisuunngortipparput:
Kuupik Kleist qatituumik erinarsoraangat, inuit ilarpassuisa canadamiumut erinarsortartumut Leonard Cohenimut assersuuttarpaat. Naalakkersuinermillu suliaqarnermi saniatigut nipilersornermik nuannarisaqarnera nalaatsornerinnaanngilaq. Nipilersoriaasermi aalajangersimasoq Qullissanit sorlaqarpoq. Kuupik Kleistip pinngitsaalisaalluni nuutsitaaneq, inuit allat 1000-it peqatigalugit, 1972-imi misigaa. Tamanna inuiaat innarlerneqarnerannik kinguneqarpoq, qallunaallu sunniuteqarpallaarnerannut, akerliuniarnermut, Namminersornerulernerup 1979-imi eqqunneqarnissaata tungaanut sakkortusaaqataalluni.
Oqaatigineqartarpoq Kuupik Kleist siusissukkulli naalakkersuinikkut anguniagaqalersimasoq, aataminit, Nikolaj Kleistimit, Qullissani naalakkersuinermik ingerlatalimmit sunnersimaneqarluni. Anguniakkat tamakku qinersinermi oqaluttuarisaanermut pingaarutilimmik ippassaq ajugaanikkut qanillattorneqarluartut.
Kuupik Kleist Roskilde Universitets Centerimit Socionomitut, tassa inuiaqatigiit inooriaatsimikkut sunniivigeqatigiittarnerannut tunngasunik, ilinniagaqarsimasuusoq, Namminersornerullutik Oqartussat allaffeqarfianni arlalinni pisortaasarsimavoq, Tusagassiornermik Ilinniarfimmi pisortaanikuulluni, Inuit Ataqatigiillu sinnerlugit 2007-ip tungaanut ukiuni arfinilinni Folketingimi ilaasortaalluni. Tamakkua saniatigut nuusiortitseqatigiiffimmi ULO-mi suleqataanikuuvoq, Kujataanilu nunaqarfinnut oqaluttuanik nipilersukkanillu katersilluni 1980-imi angalanermi angalaqataalluni. Angalanerup kinguneranik atuagaq nuussuarlu taaguutilik "Qavaat" saqqummersinneqarput. Angalanermi tassani qallunaaq nipilerisoq Anders Dohn angalaqataavoq. Taassuma Kuupik Kleist ima oqaatigaa:
- Taamanikkut maluginiarpara eqqissisimasuullunilu tatiginartuusoq. Tassami inuusukkaluaqaluni utoqqarnit nuannarineqarluarpoq. Isumaqarpungalu paasisimasaqarluarnini ataqqisaaninilu pissutigalugit taaguunneqarluarsimasoq, Anders Dohn oqarpoq.
Naggasiutigalugu SF-ip siulittaasua Villy Søvndal Kuupik Kleistimut ima siunnersuivoq:
- Inuit assigiinnerusumik atugaqalernissaat qineqqusaarutigigaanni, taava inuit assigiinnerusumik atuagaqalernissaat sulissutigisariaqarpoq. Aaqqissuusseqqinnissaq qineqqusaarutigigaanni aaqqissuusseqqittariaqarpoq. Taamaattorli isumaqarpunga IA qinigaalluarnermigut, Kalaallit Nunaat nutaaq pilersissallugu innuttaasunit pisinnaatitaaffilerneqartoq, Villy Søvndal naggasiivoq.
