KNR Jacob Abelsen KNR-imi pisortatut atorfinitsinneqassaaq

Jacob Ineqarnermut, Sanaartornermut Attaveqarnermullu Naalakkersuisoqarfimmi immikkoortortami pisortatut atorfimmeersuuvoq, aningaaserivilerinermillu Grønlandsbankenimi ilinniarsimasuulluni.

– Siulersuisuni Jacob Abelsen KNR’imi pisortassatut toqqarparput, KNR’illu ineriartortinnerata ingerlateqqinnissaani suleqatigilernissaa qilanaaralutigu, KNR’ip siulersuisuini siulittaasoq Nukaraq Eugenius ilisimatitsivoq, nangillunilu: – Ukiumi kingullermi annikigisassaanngitsunik pitsaasunik angusaqarsimavugut, Jacob Abelsenilu peqatigalugu KNR’ip ineriartortinneqarnera pilersaarutaareersut naapertorlugit nangeqqissavarput.

KNR’ip maanna pisortaa Søren Lennert Mortensen pisortatut atorfik imaannaanngitsoq ukiup aappaata affaani atorfigereerlugu qimassavaa, maannalu nulianilu inissarsiuussisarfiutertik kingumut aalluttussanngorlugu.

– Jacob KNR’imut tikilluaqqungaarparput, Suulullu KNR-imi sivikikkaluamik angusaqarfiulluartumilli sulisimaneranut qutsavigaarput, Nukaraq Eugenius naggasiivoq.

Nukaraq Eugenius
KNR’imi siulersuisut siulittaasuat