Ivik efterskolit matoqqanerat pillugu: Qaammatit marluk ukiut marlutut misiginarput

Nunatsinnit Danmarkimiillu atuartut danskit efterskoliinut uteqqikkunik ungasianiit aalaterinerit, suaartarnerit ilassiornerillu sapaatip-akunnerani matumani tullianilu malugineqassapput.

Efterskolit coronavirusip aarlerinarnera pissutigalugu qaammatini marlunni matoqqatinneqarmata kalaallit 150-it nunatsinnut ilaquttaminnut angerlarsimapput. Atuartullu allat 75-it Danmarkimi qanigisaminniinngikkunik, ilaqutariinni attaveqaatigisimasaminniinngikkunik Galtrup Efterskolimi ataatsimoortinneqarsimallutik.

AAMMA ATUARUK Kalaallit inuusuttut efterskolernerminnik corona pissutigalugu matusinerup kingorna unitsitsisut

Ivik Broberg Nuummeersoq efterskoliminut ataasinngormat utertut ilagaat.

Taanna Danmarkimiiginnarniarluni aalajangersimavoq, Aarhusillu avannaani Rønde Efterskolemiinnissaraluani Skive aanakkumiinnissaminik Vejlemilu ilaqutariinni attaveqaatigisamiinnissaminik taarsersimavaa. Qaammatillu marluk sivisusimapput.

- Efterskolimiittussaagaluarluni angerlarsimaannarluni eqqumiippoq. Qaammatit marluk ukiut marlutut misigisimanarput, susoqanngiivippormi. Suna tamarmi matoqqavoq.

Taassuma efterskolip neqeroorutigisaa tassa qarasaasiaq atorlugu atuartinneqarluarnerpaanissani angorusullugu Danmarkimiiginnarnissani aalajangerpaa.

- Alisissumik atuartinneqartarnissatsinnut piffissaq apeqqutaavoq. Nunatsinniillungami tassunga peqataasassaguma taava sisamanut makittassaanga, Ivik Broberg oqarpoq.

Naalli atuarnissaminut ullaaralaakkut makittariaqartanngikkaluarluni pikkunaalaarsimavoq.

- Eqqumiillunilu pikkunaappoq, saninniittoqanngilarmi, Ivik Broberg oqarpoq.

Atuarfiit ungasissuseqarfiullutillu malittarisassaqarlutik ammartut

Ulluinnaat sapaatip-akunnerani matumani nalinginnaanerulaaleqqissapput. Danmarkimi efterskolit ammaqqinnissamut akuersissuteqarfiupput. Ivik Brobergillu suut utaqqinerpaasimanerlugit ilisimalluarpaa.

- Ikinngutit atassuteqaatillu. Taakku qilanaarinerpaavakka.

Aamma naak Rønde Højskolimi ulluinnaat coronavirusip Danmarkimik matusinnginneranit allaanerussagaluartut.

Efterskolini atuartut eqimattani ilaqutariittut taaneqartuni amerlanerpaamik arfineq-pingasuunissaat, Danmarkimi Ilinniartitaanermut ministereqarfiup malittarisassani nutaani piumasaqaatigaa.

AAMMA ATUARUK Danmarkimi efterskolertut: Ikinngutivut maqaasivagut - Brugsenimillu ujariatsilluta

Eqimattani taakkunani 1 meterimik ungasitsigeqqusineq atuutissanngilaq. Atuartulli ilaqutariinni taakkunaniittuaannassapput eqimattanullu ilaqutariinnut allanut qanilleqqusaassanatik.

Malittarisassallu nutaat taakku Ivik Brobergip malugereerpai.

- Ippassarli (ataasinngorneq aaqq.) taakku malugisinnaavagut. Illoqarfimmukaqqusaanngilagut, allallu paarlersuaneeqqusaanata. Eqimattanut ilaqutariinnut agguaanneqarpugut taakkulu ilagisussaavagut.

Qaammatini marlunni matoqqatitsineq kalaallinut atuartunut amerlasuunut malunnartumik kinguneqarpoq. Kalaallinit efterskolertunit 225-nit 82-it Danmarkimi atuarnerminnik unitsitsiinnarniarlutik aalajangersimapput.

Ivik Brobergillu unitsitsiinnarnissani eqqarsaatigisimanngilaa.

- Uteqqinnera ilorrisimaarutigeqaara. Efterskolernerami naammasserusuppara inuulluaqqusilluarusullungalu, Ivik Broberg oqarpoq.