Ivigaasaaqqanik arsaattarfiit mingutsitsinerat misissuiffigineqalersoq
DR.dk taama allaaserisaqarpoq.
Kommuneqarfik Sermersuumi ivigaasaaqqanik arsaattarfiit arlallit 2016-imi pilersinneqarput. Timersornerlu pillugu ataatsimeersuartoqarmat Nunatsinni Danmarkimi arsaattartut kattuffiisa Nunatsinni ivigaasaaqqanik arsaattarfinnik suli amerlanerusunik pilersitsinissamik pilersaaruteqarlutik oqaatigaat. Arsaattarfiilli qanoq mingutsitsitigippat?
Norgep avannaani Tromsømi Avatangiisinik ilisimatusarnermi misissuisoqarfiup Framsenterip tamanna akissutissarsiniartussanngorpaa.
Ivigaasaaqqanik arsaattarfiit gumminik mikisuaqqanik sanaajupput, Framsenterilu naapertorlugu ingeniøritut siunnersuisarfiup COWI-p naatsorsuinerata takutippaa gummit mikisuaqqat 5 procentii arsaattarfinnit katagartartut, tassalu arsaattarfimmit ataatsimit gummit mikisuaqqat 3 aamma 5 tonsit teqqartarlutik.
Mikroplastinik mingutsitsineq ilaatigut imaanut pisarpoq aalisakkanullu uumasunullu imarmiunut allanut pisarlutik.
- Plastikkip imaanut pineratigut qanoq pisoqartarnersoq aammalu issittup imaanut avatangiisinullu qanoq sunniuteqartarnersoq paaserusupparput, avatangiisinik ilisimatusartoq Dorte Herzke Framsenterimeersoq misissuisoqarfiup nittartagaani nutaarsiassami taama oqarpoq.
Norgemi ilisimatusarnikkut suliniut ukiunik marlunnik sivisussuseqassaaq, ilisimatuullu nunani illoqarfinnilu mingutsitsinerit assigiinngissuteqarnersut aamma misissorniarpaat. Aamma mikroplastit Europamit allaniillu imaatigut Norgep avannaanut qanoq siaruaattarnersut misissorniarpaat.
Norgemi ivigaasaaqqanik arsaattarfiit 1500-pput.
