Isumaqatigiissummik atsiorneqarani aallakaatitsisartoq

Isumaqatigiissut kingulleq januaarip aallaqqaataani 2009-mi atorunnaarpoq.

Januaarip aallaqqaataa 2009 tikitsinnagu nutaamik isumaqatigiissusiornissaq pisussaagaluarpoq

taannalu 2012-p tungaanut atuuttuusussaagaluarluni. Isumaqatigiissusiortoqarsimanngilarli.

Januaarip aallaqqaataani 2009-mi KNR-ip pisortaa nutaaq, Ivalo Egede atorfinippoq, tamatumalu kinguninngua kiffartuussinissamut isumaqatigiissutip ilusilersorneqarnera suliaraa. Tamatuma kingorna isumaqatigiissutissaq KNR-ip siulersuisuunerisa Kultureqarnermut Pisortaqarfiullu akornanni uteqattaartsinneqarpoq.

Kiffartuussinissamut isumaqatigiissutissap uteqattaartsinneqarnerani isumaqatigiissut KNR-ip aningaasaqarniarnera eqqaarsaatigalugu piuminarsarneqarpoq, soorlu Kultureqarnermut Naalakkersuisup, Mimi Karlsenip Andreas Uldum-p, demokraatineersup, paragraf 36 naapertorlugu apeqqutaanut akissummini allattoq: "...piumasaqaatit piviusunngortsinnissaannut KNR-p aningaasaqarneranut naleqqussaasoqartariaqarmat".

Kultureqarnermut Naalakkersuisumut Andreas Uldum-ip aamma apeqqutigaa, Naalakkersuisup qanoq qulakkiissagaa, KNR-ip kiffartuussinissamut isumaqatigiissut atuutsissinnaagaa isumaqatigiissummik atsiortoqarsimanngippat?

Mimi Karlsenip akissutaani erserpoq, isumaqatigiissut januaarip aallaqaataa 2009 tikitsinnagu atsiornikuusaq maanna atuuttoq.

Andres Uldumip paragraf 36 naapertorlugu apereriitsiarnerani kiffartuussinissamut isumaqatigiissut nutaaq juulip aalllaqqaataani atsiorneqarpoq.