Isumalluarnerit assigiinngitsut
Upernavimmi atuarfiup inissisimanera, illoqarfinni allani - soorlu Ilulissani atuarfinnut naleqqiullugu - sanngiinnerulissasoq, Upernavimmi atuarfiup pisortaata tulliata Tekle Ghebrelolip ernummatigaa.
Kommunit kattuppata atuarfeqarfinnut kingunerisinnaasai pillugit politikkikkut saqqummiussat amigaateqarnerat Tekle Ghebrelolip pakatsinarnerarpaa.
Upernaviup nunaqarfiini sisamaasuni ilinniartitsisunik ilinniarsimasunik ukiuni kingullerni qulini 15-ininiluunniit atorfinitsitsisoqarsimanngilaq, meeqqallu naammaginartumik atuartinneqarsinnaanerat eqqarsaatigalugu akuerineqarsinnaanngitsoq Tekle Ghebrelol oqarpoq. Ajornartorsiutigineqartut ataasiakkaat paasisimanagit atuarfeqarnerup aqunneqalernissaa Tekle Ghebrelol-ip ernummatigaa.
Upernavimmilu ilinniartitsisut ukiut tamaasa suliffiup akiligaanik angalasinnaapput, Ilulissanilu ilinniartitsisut ukioq allortarlugu angalasarlutik.
Kommunit kattuppata sulliffiullu akiligaanik angalasinnaanerit assigiissinneqalerpata, Upernavimmi atuarfiup matuinnartariaqalernissaa Tekle Ghebrelol-ip ernummatigaa.
Illoqqortoormiuni atuarfiup pisortaata Peter Staffeldt-ip kommunerujussuanngortussani qinigaasussat akisussaaffimminnik eqqortumik iliuuseqartarnissaat neriuutigaa.
-Illoqqortoormiuni eqqaanilu atuarfinni ilinniartitsisut ilinniarsimasut sapinngisamik tamakkiisumik sulisorilernissaat orniginarpoq, pingaartumik marluinnik oqaasillit amigaatigeqaavut. Inuiaqatigiimmi aaqqissuussaanerat qiviarutsigu, assersuutigalugu meeqqanik paaqqinniffinni assigisaannilu, angajoqqaat naatsorsuutigisarpaat naammaginartumik sullinneqarnissartik. Taamaapportaaq meeqqat atuarfianni. Taamaattumik politikerit pimoorullugu sulissutigisariaqalerpaat ilinniartitsisunik ilinniarsimasunik atorfinitsissinissaq, Peter Staffeldt oqarpoq.
