Isumalioqatigiissitap innuttaasut peqatiginiarpai
Nunasiaataaneq qanoq misigineqarsimanersoq aamma piffissani sumiiffinnilu assigiinngitsuni kiisalu kinguaariiaat, eqimattakkuutaat aamma inuinnaat ataasiakkaat akornanni qanoq suli misigineqarnersoq aallaavigalugu isumalioqatigiissitaq sulissasoq, Saammasseqatigiinnissamut Isumalioqatigiissitamit oqaatigineqarpoq.
Taamaattumik isumalioqatigiissitap sulinissamini Nunatsinni innuttaasut tamaasa peqataatinniarpaat:
- Paaserusukkatsigut qanutununa uagut kalaallit Nunatsinni najugaqartutut, inuttut, inuiaqatigiittut nunatut qanutununa suli sunniuteqartut assigiinngitsutigut? Taakkua sunniutai assigiinngitsut qanoq allanngorsarsinnaavagut? Allanngortariaqarpat, Amalie Lynge Pedersen, Saammaasseqatigiinnissamut Isumalioqatigiissitami ilaasortaq oqarpoq.
Sumiiffik ukiorisallu apeqqutaapput
Nunasiaataasimanerup kinguneranik sunniutit atugassarititaasullu, sumiiffik ukiorissallu apeqqutaallutik assigiinngitsuusut saammasseqatigiinnermi isumalioqatigiissitaminit oqaatigineqarpoq:
- Taamaammat sapinngisamik tassani tikilluaqqorusuppagut innuttaasunit oqaluttuassat assigiinngisut. Eqikkarlugit naggataatigut Saammasseqatigiinnermi Isumalioqatigiissitami ukiuni tullerni sulinissatsinni saqqummiuttussaangatsigit, Amalie Lynge Pedersen oqarpoq.
Kisianni Saammaasseqatigiinnissamut Isumalioqatigiissitamit nunasiaataasimanermit inuiaqatigiit qanoq sunnersimaneqarnersut iluamik ersarissumik suli oqaatigineqarsinnaanngilaq:
- Tassa oqareernittuut assigiinngitsutigut, immaqa minnerusumik annerusumilluunniit ilisimanngilagut. Apeqqutaalluta kikkuunerluta. Taamaammat aamma soqutigisorujussuuarput inuiaqatigiit sapinngisamik tamakkiiniartussamik assigiinngitsutigut nipai tusaaniassallugit, Amalie Lynge Pedersen oqarpoq nangillunilu:
Nuniasiaatitut oqaluttuarisaanerup oqaluttuaruneqassaaq
- Tamatta uagut Kalaallit Nunaanni najugaqartuusugut oqaluttuassagut, misigisimasagut generationini assigiinngitsuni sumiikkaluaruttaluunniit Nunatsinni assigiinngitsunik atugassaqarfiusimasumi misigisimasagut assigiinngitsuugamik, Amalie Lynge Pedersen oqarpoq.
Taamaammat Saammaateqatigiinnissamut Isumalioqatigiissitamit pingaartinneqartut ilaagaat nunasiaatitut oqaluttuarisaanerup siornatigut maannakkullu pisartut eqqarsaatigalugit oqaluttuarineqarnissaa, tusarnaarneqarnissaa akuerineqarnissaalu:
- Tassaniippoq aamma saammaasseqatigiinnissami immaqa ilisimanngitsut imaluunniit arlaatigut timimikkut, tarnimikkut anersaamikkut ersinngiusattumik atuutsitsisut. Kingunerisimasaasa taakkua ersarissarneratigut, isumaqarpugut upperalugulu saammaateqatigiinnermi angusassat inuttut, inuiattut nunatut assigiinngitsutigut nukinnik nutaanik siunissamut ingerlajuartuarnitsinnut pilersitsiumaassammat, Amalie Lynge Pedersen oqarpoq.
