Isumalioqatigiissitaliaq Canadami ingerlaqqippoq
Isumalioqatigiissitaliap sulinera ukiumik ataatsimik sivitsorneqassaaq, 2015-imi juunimi naammassineqartussanngortinneqassalluni. Paasissutissat tuusintilikkaat, Canadami Naalakkersuisunit maannamut isertuunneqarsimasut, Isumalioqatigiissitaliamut ammarneqarsimanerat matumani pissutaavoq.
Canadap Naalakkersuisuisa paasissutissanik isertuussisimanerat ilaatigut pissutaalluni Isumalioqatigiissitap sulinera aporfeqarsimavoq.
Inuit, indianerit metisillu meerartaat 150.000-it piffissami 1870-imit 1996-imut pinngitsaalisaallutik kostskolenut aallartitaasimasut pillugu Isumalioqatigiissitaq 2009-imili tusarniaalluni Canadami angalasimavoq.
Meeqqat pineqartut qaamasunik amillit inooriaasiannik inooriaaseqalernissaat anguniarlugu kostskolenut aallartitaasarsimapput, atugarliortitaasimallutillu ilaatigut atornerlugaasarsimallutik.
Isumalioqatigiissitaq taamaammat Ilumoortussaq pillugu nuna tamakkerlugu angalasimavoq, inuit tusarniaaviginiarlugit, naggueqatigiit Inuit, Indianerit Canadamiullu akornanni saammaateqatigiittoqarnissaa suliniutaalluni.
Isumalioqatigiissitallu sulinerata ukiumik ataatsimik sivitsorneqarnera, Inuit Tapiriit Kanatami siulittaasup Terry Audlap nuannaarutigaa.
