Ataatsimiititaliap siulittaasua: Isumaginninnikkut sullissineq pitsanngorsarneqassaaq
Tamanna kommunimit meeqqanut inuusuttunullu tunngasunik sulianik misissueqqissaalersumit oqariartuutigineqarpoq.
AAMMA ATUARUK Meeqqanut tunngasunik suliat misissoqqissaarneqalerput
- Inatsisartut inatsisaanni allassimavoq meeraq pinngitsoorani akunnerit 24-t iluanni sullinneqassasoq. Kommunip taanna malittussaavaa aamma malissavarput, Kommuneqarfik Sermersuumi meeqqanut ilaqutariinnullu ataatsimiititaliami siulittaasoq, Uju Petersen oqarpoq.
Nakkutilliisunit isornartorsiorneqangaatsiartoq
Kommuneqarfik Sermersooq suliaminik ingerlatsinerliormat, meeqqat inuusuttullu ikiortariaqartut sumiginnagaasut Namminersorlutik Oqartussat Nakkutilliinermik ingerlatsiviata nalunaarusiaani juunimi inerniliunneqarpoq.
AAMMA ATUARUK Sermersuumi meeqqanut tunngatillugu suliat kukkunersiuisartup misissulerai
Tamannalu peqqutigalugu, kommunillumi suliaminik ineriartortitsinissamut pilersaarutaani ilaammat, kommunimi suliat meeqqanut inuusuttunullu tunngasut 2.200-t misissoqqissaarneqassapput.
- Sumiginnaasugut nakkutilliivimminngaanniit naliliiffigineqarnikuuvugut. Isumaqarpungalu suliassaq ippassaq akuersissutigisarput taanna ukiuni sisamani tulliuttuni sakkussaqalerluta, siulittaasoq, Uju Petersen oqarpoq.
Kommunip kukkunersiuisuni, Deloitte, meeqqanut inuusuttunullu sulianik ukiut sisamat ingerlanerini misissueqqullugu suliakkippaa.
Taava aamma aqutsisut immikkoortortaqarfimmi sullissisunik ilitsersuillutik, sulianik nalilersuillutik kissaatigisatullu naammassineqarnersut misissortassallugit. Aqutsisut sukaterinerat suleriaatsimik ineriartortitseqataassasoq, kommuni pilersaarummini allappoq.
AAMMA ATUARUK Sermersuumi meeqqat pisortanit sumiginnagaapput
Siulittaasoq: Kukkuluttornerit imaasiallaannaq anigorsinnaanngilagut
Sullissinerli aqaguinnaq iluarsissanngitsoq, siulittaasup nassuerutigaa.
- Kukkuluttornerit, soorlu assersuutigalugit nakkutilliivimminngaanniit allaaserineqartut, taakkua imaasiallaannaq anigorsinnaanngilagut, kisianni najoqqutassaqalerpugut, Kommuneqarfik Sermersuumi meeqqanut ilaqutariinnullu ataatsimiititaliami siulittaasoq, Uju Petersen oqarpoq.
