Qisuariaatit: Issittup illersorneqarnera sipaarniarnermit eqqugaassanngilaq
Illersornissamut qullersaqarfiup missingersuutaanik pisariillisaanissamik misissueqqissaarnermi siunnersuutigineqartutut Illersornissamut qullersaqarfiup Issittumi suliaanik annikillisaanissamut piffissaanngilaq.
Socialdemokraatit illersornissaq pillugu oqaaseqartartuat, Henrik Dam Kristensen, KNR-imut taama oqarpoq.
- Tamanna nangaanartoqartittupilussuuara.
AAMMA ATUARUK Illersornissamut qullersaqarfik Issittumi sipaarniuteqassasoq
Missingersuutinik misissueqqissaarneq danskit naalakkersuisuinit suliakkiissutigineqarpoq. Tassanilu sammisat assigiinngitsorpassuit saqqummiunneqarput, soorlu assersuutigalugu umiarsuit alapernaarsuutit angalasarnerinut ullut ikilisinnerisigut umiarsuillu inuttaasa ikilisinnerisigut nunatta imartaanik nakkutilliinerup millionit koruunit arlallit nalinginut annikillisinneqarnissaa.
Henrik Dam Kristensenilli politikkikkut isumaqatigiissut siorna decembarip qaammataaneersoq innersuussutigaa, Illersornissamut qullersaqarfiup Issittumi suliassaanut 120 millionit koruunit immikkoortinneqarnissaat Folketingimi amerlanerussuteqartunit isumaqatigiissutigineqarmat.
- Issittoq pillugu ukiup ataatsip matuma siorna isumaqatigiissutigisarput pitsaalluinnartuusoraara. Issittumilu qanoq inissisimasoqarnera unammillernartullu nutaat eqqarsaatigalugit, isumaqarpunga aalajangiusimaannartariaqaripput, Henrik Dam Kristensen taama oqarpoq.
Issittumut aningaasaliissutit amerlineqarnerat saamerliit isumaqatigiinngissutigigaat
Dam Kristensenilli Illersornissamut qullersaqarfiup Issittumi suliaanut missingersuutit annertusineqartariaqarsorinngilai.
- Isumaqarpunga Issittumut tunngatillugu maannakkorpiaq tunniussinnaasagut tunniutereerlutigit. Imali paasineqassanngilaq qaqumorsuarmulluunniit nikeriaqqittoqarsinnaassanngitsoq, Dam Kristensen oqarpoq.
AAMMA ATUARUK Illersornissamut aningaasaliissutit amerlineqarnissaat taperseraat
Radikale Vestrelli illersornissaq pillugu oqaaseqartartuata, Martin Lidegaardip, tamanna isumaqataaffiginngilaa.
Illersornissaq pillugu isumaqatigiinniartoqalerpat partiip piumasaqaatissaata pingaarnerit sisamaasut ilagissavaat Illersornissamut qullersaqarfiup Issittumi suliassai. Piumasaqaatit allat marluk tassaapput danskit eqqissisimanissamik nakkutilliinikkut suliniutinut peqataanerisa marloriaatinngortinnissaa aamma sakkutuut imarsiortut nukittorsaavigineqarnissaat qarasaasiatigullu avataanit ajutoortitsiniutinut illersorneqarnerup nukittorsarneqarnissaa.
- Kalaallit Nunaanni issittumilu sulianik annikillisaanissamik kissaateqanngilagut. Isumassarsiatsialaaneranik isumaqataalersinneqassagutta sivisuumik itisuumillu oqaloqatigeqqaarneqartariaqassaagut. Illersornissamut qullersaqarfiup nammineq tunngavilersuutigisai soorunami tusassallugit suli amigaatigaakka. Aamma tusartariaqarpakka. Tunngaviatigulli annikillisaasoqarnissaa isumaqataaffiginngilarput, Martin Lidegaard taama oqarpoq.
AAMMA ATUARUK Aaja: Illersornissaqarfik aningaasanik amerlanernik pisariaqartitsivoq
Illersornissamut qullersaqarfiup "malunnaatilimmik pitsanngorsaaffigineqarnissaa" kissaatigalugu danskit naalakkersuisuisa siornatigut nalunaarutigaat. Tamannalu Dansk Folkepartiimit taperserneqarpoq.
Danskit naalakkersuisuisa illersornissaq pillugu pilersaarutiminnik sapaatit akunnerini tullerni saqqummiussinissaat naatsorsuutigineqarpoq, tamannalu pippat illersornissaq pillugu maanna isumaqatigiissuteqartunit, Socialdemokraatinit, Radikale Venstremit, SF-imit, Dansk Folkepartiimit partiinillu naalakkersuisuutitaqartunit isumaqatigiinniutigineqartussaassaaq.
AAMMA ATUARUK Illersornissaq pillugu isumaqatigiinniarnerni nunarput peqataatinneqassanngitsoq
