Issittumut naleqquttunik sanaartornermi ineriartortitsisoqassaaq

A. P. Møller-imit millionilikkaanik tapersersorneqartumik sanaartoriaatsinik issittumut naleqqussarsimasunik maanna ineriartortitsisoqarnialerpoq.
Allattoq Erna Lynge
juunip 30-at 2015 13:14

"Issittumi sanaartoriaaseq nutaamik" taallugu pilersaarummi DTU, Rambøll aamma Tegnestuen Vandkunsten suleqatigiillutik pilersaarusiortuupput.

Vandkunstimeersup illussanik titartaasartup Jens Thomas Arnfredip issittumi pissutsit immikkut ittut tikkuartorpai, qaarsuni nunagissaasarneq akisusaqisoq, apisarnerujussua, avinngarusimasorujussuarmiinneq sivikitsuinnarmillu sanaartorsinnaasarneq taakkartorpai.

Illussanilli titartaasartup taarsiullugu taakkartorpai, avatangiisit pinnissusersuat, isikkiviit tupinnaannartut Issittumilu qaamarngup tupinnartuunera.

Pilersaarusiortut isumaqarput Kalaallit Nunaanni illulioriaaseq Europamiut sanaartoriaasiannit maannamut sunnerneqarsimaqisoq.

Sanaartornermi atorneqartartut aamma eqqarsaatigalugit, soorlu qisuk issittumi nassaassaavallaanngikkaluartoq.

"Issittumi sanaartoriaaseq nutaaq" tassaavoq ineriartortitseqqinneq, Tegnestuen Vandkunsten, illussanillu titartaasartut Qarsoq aamma Clement & Carlsen Nuummeersut Venedigimi 2012-imi Arkitekturbiennalenimi saqqummersitsinersuarmi saqqummersissimasaannik ingerlatitseqqinnerusoq.