Nalunaarusiaq Issittumi umiarsualeeqqittoqaranilu timmisartuleeqqittoqassanngilaq
Issittoq pillugu nalunaarusiami qangali utaqqineqartumi, danskit naalakkersuisuinit ataasinngorpat saqqummiunneqartussami, KNR-imi paasisavut tunngavigalugit taama allassimasoqarpoq.
Nalunaarusiaq ukiuni tullerni qulini qanoq pisoqarnissaanik misissueqqissaarinermik imaqarpoq, Issittumilu umiarsuit qanoq angallatsiginissaannik naatsorsuuteqarneq tunngavigalugu nalilerneqarpoq Illersornissaqarfiup umiarsuaatai alapernaarsuutit ullumikkut arfineq-marluusut ajutoortoqassagaluarpat allatigulluunniit pisoqassagaluarpoq, aamma Issittumi namminersortuunerup innarnerleqannginnissaanik nakkutilliinissamut naammassasut.
Ajutoortoqarsinnaanera illoqarfiit umiarsualiveqarfissuit qanittuaniinnerusoq, imaani avatangiisit pillugit misissueqqissaarinermi erseqqissaatigineqarpoq. Aamma umiarsuit qanoq angallatsiginissaannik naliliineq malillugu umiarsuit angallattut amerleriartorpallaarunnaassapput, naak amerliartornissaat siornatigut naatsorsuutigineqarsimagaluartoq.
Sakkutuut imarsiortut taamaalillutik Issittumi suliaqarnissaminnut pisariaqartitaat naammareerput, umiarsuarmik alapernaarsuut, umiarsuartut Knud Rasmussenitut ittoq, qanittukkut atulerneqartussaq ilanngullugu. Aammattaaq sorsuuteeqqanik aasaanerani sikoqannginnerani Issittumi angalasinnaasunik atuinissamut periarfissaqassaaq.
Aamma atuaruk Issittumi kajumissutsimik upajungaarsimasoqarnissaq danskinit taperserneqarpoq
Timmisartoq ataaseq - qaammataasallu arlallit
Tamannalu aamma silaannakkut nakkutilliinermut atuuppoq. Allannguutissatuarmi tassaavoq timmisartoq Challengeri ullumikkutut piffissap ilaannaani Kangerlussuarmiitinneqartarunnaarluni ataavartumik tassani inissisimatinneqartalertussaq.
Illersornissaqarfimmi nutarsaanerit pingaarnersaat nakkutilliinermiissaaq. Illersornissaqarfiummi Kunngeqarfiup Issittumi pigisaanik tamakkiinerusumik nakkutilliinissaanut akiliilluni qaammataasanik atuisoqassaaq.
Issittumi imartani, nunami silaannakkullu susoqarneranik Illersornissaqarfik tamakkiisumik ullumikkut nakkutilliisinnaanngilaq. Qaammataasalli atorlugit nakkutilliisoqalerneratigut Issittumi Sakkutooqarfimmi Nuummiittumi sulisut 15-20-nik amerlineqassapput - tamannalu KNR-imi paasisavut naapertorlugit ukiumut 15 millionit koruunit missaannik akeqassaaq.
Sakkutuujunngitsut sulisorineqarnerussapput, taakkulu nakkutilliinermi paasissutissanik pissarsiarineqartunik suliaqassapput, Illersornissaqarfiullu Issittumi suliaata pitsaanerusumik agguataarneqarnissaa taamaaliornikkut qulakkeerniarneqassaaq.
Tamannalu ilaatigut qulimiguullit nutaat Seahawkit qulingiluat, Illersornissaqarfiup 2012-imi piniarsimasai atorlugit pissaaq, taakkumi Issittumi suliaqarnermiut ilanngutsitinneqassammata.
Aamma atuaruk Issittumi kajumissutsimik upajungaarsimasoqarnissaq danskinit taperserneqarpoq
Kajumissutsiminnik suliaqartut pingaaruteqartut
Nunatsinni kajumissutsiminnik upalungaarsimasussanik, Canadami Canadian Rangersit imaluunniit Islandimi ICE-SAR-it assigisaannik, pilersitsinissaq nunatsinni politikerit ukiuni arlalinni ujartorsimavaat. Taamatullu kissaateqartoqarnera nalunaarusiami taperserneqarpoq.
Nunatsinni innuttaasut upalungaarsimasussanut namminneq kajumissutsiminnik ilanngussinnaanerat, soorlu assersuutigalugu namminneq umiatsiaatitik atortussanngorlugit, kaammattuutigineqarpoq. Taamaaliornikkut ajutoortoqassagaluarpat imaluunniit nalinginnaasumik nakkutilliisoqassatillugu Issittumi Sakkutooqarfiup taakku ikiortiserisinnaassavai.
Aamma Issittumi Sakkutooqarfiup ataani immikkut kiffartuussivimmik pilersitsisoqarnissaa kaammattuutigineqarpoq, sakkutuujunngitsullu imaani nunalluunniit timaani nalinginnaanngitsunik naammattuugaqarsimasut tassunga nalunaaruteqartarsinnaassaallutik - Danmarkimi nalunaaruteqartarfiit assigiinngitsut assigalugit.
Aamma atuaruk Issittoq pillugu Nunarput nammineq periusissiortariaqarpoq
MIssingersuutit ilaneqassanngillat
Tamakkuli tamarmik qanoq akeqassappat? Nalunaarusiaq naapertorlugu missingersuutit ilaneqassanngillat.
Illersornissaqarfiup Issittumi suliaqarfimminut maanna missingersuutigisai Folketingimi 2013-imi amerlanerussuteqartunit akuersissutigineqarput, ukiunilu 2015-imit 2017-imut ukiumoortumik 120 millionit koruuninik aningaasartaqarlutik. Aningaasaliissutinillu taakkunannga atunngitsuukkat ukiup tullianut nuunneqarsinnaanngillat, ukiummi naanerani atunngitsuugaqarsimappat taakku naalagaaffiup karsianut utertinneqartartussaapput.
Kaammattuutigineqartorli tassaavoq ukiumoortumik aningaasaliissutaasut 120 millionit koruuniusut ataavartunngortinneqassasut, aammalu sakkutooqarneq pillugu isumaqatigiissut 2017-imi atorunnaarpat ingerlatiinnarneqassasut.
Issittoq pillugu nalunaarusiortitsinissaq 2013-imi imissutigineqarpoq, Inatsisartunullu 2014-imi qinersisoqarnera Folketingimullu 2015-imi qinersisoqarnera pissutigalugit kinguaattoorutigineqangaatsiarpoq.
Nalunaarusiap Københavnimi Nordatlantens Bryggemi ataasinngorpat tamanut saqqummiunneqarnissaa naatsorsuutigineqarpoq.
