Issittumi Siunnersuisooqatigiit admiraliusimasup siuttuuffigissavai

USA-p Issittumi Siunnersuisooqatigiit siuttuuffigisussanngorpai.

USA-p nunanut allanut ministeria, John Kerry, Issittumi Siunnersuisooqatigiinni siulittaasuuvoq, taassumalu admiral Robert Papp USA-p issittumi immikkut aallartitaatut toqqarsimavaa taamaalillunilu taanna aamma Issittumi Siunnersuisooqatigiinni ulluinnarni aqutsisuussalluni.

Admiral Pappip KNR-imit apersorneqarnermini oqaatigaa Issittumi Siunnersuisooqatigiinni ukiuni tullerni marlunni aqutsisussanngornermini suliassat pingasut pingaarnertut sulissutiginiarlugit.

Siullertullu, issittup pigisaa silallu pissusiata allanngoriartornera amerikamiunut paasititsiniutiginiarpai. Tamakku amerikamiunit ilisimasaqarfigineqarpallaanngimmata. Inuussuttullu issittup pigisaanik ilisimasaqarnerulernissaat pingaartillugu aamma sulissutiginiarpaa.

Admiral Pappip, amerikamiut sinerissami alapernaarsuutaanni kommandantitut atorfeqarsimasup, issittup imartaani umiarsuakkut angallannerup isumannaannerulersinneqarnissaa aamma pingaartittupilussuuaa.

Taamaammat ujaasinermi annaassiniarnermilu aaqqissuussinerit tapersersorumavai, umiarsuit isumannaannerusumik angalasinnaanngortortillugit issittumilu ajunaarnersuit pinngitsoortikkumallugit.

Pingajuattullu, admiral Pappip KNR-imut oqaatigaa, USA-p ukiuni tullerni marlunni aqutsisuunermini nukittuumik inissisimanissaa pingaaruteqartoq.