Issittumi sakkutooqarfik Narsarsuarmut innersuunneqarpoq

Kommune Kujallermi borgmesteri innersuussineq nuannaarutigaa:

- Tusaaniarneqartutut malunnarmat maannakkut soorunami uagutsinnut nuannerpoq. Aamma neriuppugut tamanna aalajangiusimaneqassasoq. Aamma neriuppugut inatsisartut aamma naalakkersuisut ataatsimoorlutik isumaqatigiillutik aalajangerneq pigiumaaraat neriuppugut piffissaq nallerpat, sulimi nalunartoqarpoq, Borgmester Simon Simonsen Issittumi sakkutooqarfiup Narsarsuarmi inissinneqarnissaannut Inuit Ataqatigiit inatsisartunit ilaasortaatitaasa isummernerisa kingorna taama oqarpoq.

Nunaqarfinnilu aqutsisut siulittaasuata Jørgen Lundip Narsarsuarmi inuit sullissilluarsinnaasut misilittagallit pigineqartut oqaatigaa, kiisalu issittumi sakkutooqarfiunissaanut piukkunnaateqarluartoq erseqqissarlugu.

- Tassa Narsarsuaq nunataqarpoq annertuumik, taavalu umiarsualiveqarnikkut pitsaasumik inissisimalluni. Tassa itisuumik umiarsualiveqarpoq pitsaasumik. Angisuunit talisimaffigineqarsinnaalluni ajornartorsiutaanngitsumik. Tassa sakkutooqarfiunissaanut piukkunnarluarpoq Narsarsuaq, Jørgen Lund oqarpoq.

Inuussutissarsiornikkullu siunissami ineriartortitsinissamut atatillugu issittumi sakkutooqarfik tapertaalluassasoq, Simon Simonsen isumaqarpoq. 

- Kommune Kujallermi suliffissaaleqiffiuvugut annertuumik aamma pisut saaffissallu killeqarnerat allallu ingerlatsiviit killeqarpallaarneri assut ajornartorsiutigisarpagut. Taamaammat sinerissami allanillu suliassaqarfinnik akisussaaffeqarfinnillu agguaassinermi periarfissagissaartutut isigiuaratta, taamatut aalajangertoqarsinnaanissaa neriulluarfigeqaarput, borgmester Simon Simonsen oqarpoq.

Issittumi Sakkutooqarfiup inissisimaffissaa ukiamut aalajangiunneqartussaavoq.

Inuit Ataqatigiit Narsarsuaq innersuussutigigaluaraat qanorluunniit suli pisoqarsinnaasoq, Borgmester Simon Simonsen oqarpoq.