Issittumi naalagaaffiit sinniisaat ataatsimiilerput
Namminersornerullutik Oqartussat issittumi suleqatitik nunat issittumiittut siunnersuisoqatigiivisa sapaatip-akunnerani matumani ataatsimiinnerannut atatillugu Islandimi naapissavaat.
Issittumi Siunnersuisoqatigiit naalagaaffinnik arfineq-pingasunik ilaasortaqarput, nunallu inuiisa suliniaqatigiiffii arfinillit aamma ilaasortaapput. Danmarkip nunanut allanut ministeria ataatsimiinnermi peqataasinnaanngimmat naalagaaffeqatigiit sinnerlugit ataatsimiinnermi nunanut allanut naalakkersuisoq Josef Motzfeldt peqataassaaq.
Issittumi Siunnersuisoqatigiit ataatsimiinneranni avatangiisinut tunngasut annerusumik sammineqassapput. Silaannaap allanngoriartornera pillugu ilisimatuut nunanit tamalaaneersut missuereerlutik nalunaarusiarsuat aallaavigalugu siunnersuisoqatigiit inassuteqarnissaminnut isummissapput.
Isummernermilu ilaasortat tamarmiusut isumaqataanissaat pisariaqartinneqassaaq. Nunani ilaasortaatitaqartunit USA innersuussutigineqartunut tukernersortuarsimavoq, pingaartumik silaannaap ipinartumik mingutsinneqarnerata millisarneqarnissaanut tunngasuni. USA-p ilaasortaaqatiminit tatisimaneqarluni inassutissanut akuersisariaqarnera tusagassiuutitigut annertuumik kingullertigut sammineqarpoq, tamannali tassa ataatsimiinnermi paasinarsissaaq.
