Issittoq Nunarpullu pillugit oqalliseqataagit
Nunat allanut tunngasunut ministereqarfik Kulturikkut illorsuarmi Katuami tamanut ammasumik oqallittoqarnissaanut aggersaavoq, Issittup kunngeqarfiup nunanut allanut tunngasunut 2030-p tungaanut politikkiani inissisimaffia eqqarsaatigalugu periarfissat suunersut oqallisigineqassallutik.
Katuami ualikkut nalunaaqutaq marluniit sisamat tungaanut oqallitsitsisoqassaaq, Issittorlu pillugu Danmarkimi nunanut allanut tunngasunut ministereqarfimmit aallartitatut tunualersoq Erik Vilstrup Lorenzen naapinneqarsinnaassaaq. Taassuma Issittumi aallartitatut kingoraartissaa Hanne Fugl Eskjær ukioq manna aggustimi aallartissaaq.
Aallartitaq Peter Taksøe-Jensen aamma saqqummiussissaaq. Taanna Danmarkimi naalakkersuisut sinnerlugit aamma nassuiaasartuuvoq. Tassa Danmarkip nunanut allanut tunngasunut politikkianik nassuiaasartuuvoq, 2030-llu tungaanut politikkissami suut pingaarnertut suliniutigineqassanersut pillugit tikkuussisuusartuulluni.
Nalunaarusiap ukioq manna maajip aallaqqaataani naammassineqarsimanissaa pilersaarutaavoq.