Issittoq akimorlugu filmiliornissanik pilersaarutit
Pilersaarut 'Arctic Film Circle' Saamit Nunaanni Nunavummilu filmiliortartunit suleqatigissutigineqarnissaanik isumassarsiaavoq.
Tassani siunertarianeqarluni, Issittumi filmiliortartut katersorneqareerpata, taakku ilitsersuummik allagaqassasut sammineqassalluni filmiliornerit piviusuunngitsunik aallaaveqartut naatsut.
Taakku allanneqareerpata filmit naatsut tallimat saqqummersinneqarnissaat pilersaarutaavoq. Taakku filmiliarineqassallutik Issittumi nunani assigiinngitsuni.
Kalaallit Nunaannit peqataasussaat tassaapput filmilortartut, Pipaluk K. Jørgensen aamma Mikisoq H. Lynge. Aamma Saamit Nunaanniit filmiliortartut pingasut, Nunavummit marluk, Alaskamit ataaseq taamatullu Nunavimmit aamma ataaseq peqataassallutik.
Suliniut tamanna tamanut saqqummiunneqassaaq sapaatip akunnerani tullermi, tamanna pissalluni Torontomi filmfestivalertoqarnerata nalaani taasami, ImagineNative film and media festival. Taanna pissaaq ulluni oktobarip aqqaneq aappaanniit 14-niata tungaanut.
Filmiliat naatsut naammassineqareersimassapput, aappaagut novembarimi. Siunertaavoq filmit naatsut pillugit filmfestivalertoqarnerani Berlinimi 2017-imi pisussami takutinneqarnissaat. Festivalimi tassani sammineqassalluni, Issittumi inuit.
