Islandip præsidentia: Ataatsimeersuarneq oqaluttuarisaanermut pingaarutilik
- Nunani tamalaaneersut aatsaat taama amerlatigisut Issittup siunissaanik eqqartuiartorlutik Nuummiipput, Olafur Ragnar Grimsson taama oqaluttuarpoq.
Qaaqqusat nuimasut Nuummi maannakkorpiaq katersuussimasut taama amerlatiginerat - inuit 350-it nunanit assigiinngitsunit 20-neersut - pissutigalugit ataatsimeersuarneq oqaluttuarisaanermut pingaarutilittut Issittumilu ineriartortitsinissamut pingaaruteqarluinnartutut taavaa.
- Ministerit Singaporemeersut, USA-mi aningaasarsiornikkut suliaqartut siuttui nuimasut, Europamiut Issittumilu naalagaaffiit siuttui allat maaniipput.
Aamma atuaruk Arctic Circle Greenland Forum: Nunatta oqaluttuarisaanerani pingaarutilik
Canadap Islandillu - Nunatta issittumi sanilerisai - tamarmik immikkut amerlasuunik peqataajartortitaqartut aamma eqqaavaa.
- Isummersoqatigiiffimmi matumani Canadap, Kalaallit Nunaata Islandillu ataasiullutillu pingasuunerat takusinnaavarput, nunallu atortulersuutinik qanoq sanaartortoqartarnera, takornariartitsineq, timmisartut aqqutigisartagaat allarpassuillu pillugit attaveqaqatigiinnissamut ilisimasanik avitseqatigiittoqarsinnaanera aamma takusinnaavarput))
Grimsson naapertorlugu, Arctic Circle Forum taamaalilluni Nunatta pingaarutilinnik attaveqaqateqalernissaanut Nunatsinnilu atugarissaarnerulernissamut periarfissatsialaavoq.
- Issittumi Isummersoqatigiiffimmi siunertaavoq Kalaallit Nunaanni inuiaat namminneq misilittakkaminnik avitseqateqarnissaat, aammali inuunermik, peqqinnissaqarfiup aningaasarsiornikkullu periarfissat pitsaanerulernissaannut allat ilinniarfigisinnaallugit, Islandip præsidentia, Olafur Ragnar Grimsson, taama oqarpoq.
