ASSIT: Islandimiunik misiginneqataasut
Islandimiup arnap 20-nik ukiullip, Birna Brjánsdóttirip, ujaarineqarnerani Nunatsinni inuit tuusintillit Islandimiut assingalugit nassaarineqarnissaa pissangallutik utaqqisimavaat. Birna arfininngormat kingullermi periarfeerunneqarpoq, ajoraluartumilli toqungasoq nassaarineqarsimasoq Islandimi politiit ippassaq sapaammi nalunaarutigaat.
Suliaq Birnamut tunngasoq Nunatsinni innuttaasunit malinnaaffigilluarneqarpoq, periarfeerunneqarnera kilisaammi Nunatsinneersumi inuttanut marlunnut attuumassuteqarsorineqarmat.
Arnap 20-nik ukiullip timaata toqungasup nassaarineqarnera Islandimi politiinit tusagassiortunik katersortitsinermi uppernarsarneqareersorlu, Nunatsinni illoqarfinni arlalinni innuttaasut eqqaaniaaniarlutik aaqqissuussipallapput.
Nuuk
Nuummiut hunnorujulippassuit naneruutinik ikitsiartorlutik Islandip Nuummi sinniisoqarfiata saavani katersuupput. Oqaaaseqartoqarpallaarani eqqissisimasumik eqqaaniaasoqarpoq.
Inuit eqitaarput tussiartoqarlunilu. Ataatsimut isigalugu inuit aliatsassimaaraluarlutik nanertisimaarpasinngillat.
Maniitsoq
Maniitsormiut aamma Birna eqqaaniarlugu naneruutinik ikitsiniarlutik illoqarfiup qeqqani naapipput.
Qaqortoq
Qaqortormiut aamma sunnertisimaartupilussuupput. Birna eqqaaniarlugu naneruutinik ikitsiniarlutik tissaluttup eqqaani katersuupput.
- Qaqortumi unnuk alutornarluinnarpoq nipaallunilu. Inuit tissaluttumi katersuupput naneruutinik ikitsiniarlutik, Edda Lyberth KNR-imut oqarluttuarpoq.
Nalunaaqutaq 19.00 Islandimiut tussiutaat meeqqanoortoq Ó Jesu brodir besti tussiarneqarpoq oqalugiartoqarlunilu.
Birna Brjansdottir kisiat pillugu katersuuttoqanngilaq. Aamma arnaq Tasiilami toqutaasoq ilaqutaalu pillugit naneruutinik ikitsisoqarpoq. Angut Danmarkimi Skagenimi toqutaasoq aamma eqqaaniarneqartoq Edda Lyberth oqaluttuarpoq.
- Minutsini marlunni nipaallisimasoqareersoq tussiutit marluk tussiutigineqarput. Tissaluttumi ataatsimuussuseq nukittooq malunnarpoq, tamannalu nuannerpoq, Edda Lyberth oqarpoq.
- Angerlarsimaffiit igaluaavini naneruutinik ikititserisoqarsimasoq angerlarninni maluginiarpara.
AAMMA ATUARUK Polar Nanumi inuttaasut attortisimaqisut
