Islandimi USA-milu aallartitaqalerunarpugut
Nunatta nunani allani aallartitaqalernissaanik siunnersuut Atassutip Inatsisartuni ilaasortaatitaanit Siverth K. Heilmannimit aamma Knud Kristiansenimit 2011-mi Inatsisartut ukiaanerani katersorneranni qaqilerneqarpoq. Siunnersuut maanna Nunanut allanut Sillimaniarnermullu Ataatsimiititaliami suliarineqareerpoq.
Atassummeersut taakku marluk siunnersuutigaat Namminersorlutik Oqartsusat USA-mi, Tysklandimi Ruslandimilu aallartitaqalissasut. Nunatsinnut soqutiginaatilinni Nunatta aallartitaqalernissaa tunngaviatigut partiit allat aamma isumaqatigaat. Taamaattoq oqallisigineqarsimavoq nunat sorliit aallartitaqarfiginissaat piukkunnarnerunersoq.
Nunanut allanut Sillimaniarnermullu ataatsimiitialiaq isumaqatigiissoq inassuteqarpoq Islandimi USAmilu aallartitaqalertariaqartoq.
- Suliffeqarfiit Islandimeersut arlallit nunatsinni ingerlataqarput, aalajangersimasumillu timmisartukkut attaveqartarpugut. Taamatuttaaq ukiut kingulliit ingerlaneranni nunatsinni Islandimilu peqqinnissaqarfiit akornanni suleqatigiinnermik pitsaasumik ingerlalluartumillu ineriartortitsisoqarsimavoq, Nunanut allanut Sillimaniarnermullu ataatsimiititaliaq Islandimi aallartitaqalernissap pisariaqassusaa tunngavilersorpaa ilanngullugu taavaa Nunat avannarliit killiit suleqatigiinnerat aamma aalisarnikkut Islandimik suleqateqarneq.
Aammattaaq USA-mi aallartitaqalernissaq pingaartinneqarpoq.
- USA-mi nunatta sinniisoqarfeqalerneratigut Naalagaaffinni Peqatigiinni nunat inoqqaavisa pisinnaatitaaffii siuasarniarlugit Naalakkersuisut suliniarnerat annertusarneqarsinnaalissaaq, ataatsimiititaliaq isumaliutissiissummini allappoq.
Ataatsimiititaliarli isumaqarput Nunatta Ruslandimi Tuluillu Nunaanni soqutigasai Nunatta Bruxelles-mi aallartitaqarfianit isumagineqarsinnaasut.
Kina Issittumi siunnersuisoqatigiinnut ilanngunniarluni ilungersuuteqartot aamma periarfissat ilaattutt taaneqarpoq.
- Ataatsimiititaliap nalilerpaa ukiut aggersut ingerlaneranni pissusissa-misuussasoq nunatta Kinalu akornanni attaveqaatit nukittorsarneqarnissaannut, isumaqarlunili tamanna maanna siusippallaartoq. Naalakkersuisut allatut naliliippata tamanna ataatsimiititaliap soorunami tamakkiisumik akuerissavaa, Nunanut allanut sillimaniarnermullu ataatsimiititaliaq isumaliutissiissummini allappoq.
Siunnersuut aappassaanneerlugu suliarineqassaaq sisamanngorneq maajip qulingat.
Forslaget bliver anden behandlet i Inatsisartut torsdag den 10. maj.
