Islandimi qinersinerup kingorna suli naalakkersuisunngortitsisoqanngilaq
Piratpartiimeersup Birgitta Jónsdóttirip ippassaq ataasinngornermi nalunaarutigaa naalakkersuisunngortitsinissamut toqqammavissamik aamma iluatsitsisinnaasimanani.
- Inuit kimigiiserfigalugit suleqatigiissinniarneqarsinnaanngillat, Jónsdóttir islandimiut aviisiannut Morgunbladidimut taama oqarpoq.
Kinguneqanngitsumik marloriarluni naalakkersuisunngortitsiniartoqareersoq Piratpartii naalakkersuisunngortitsiniarnermi siuttussatut decembarip qaammataata aallartinnerani toqqarneqarpoq.
Partiit katillugit tallimat kingorna isumaqatigiinniarput, ataasinngormalli avissaaginnarniarlutik taakku aalajangerput.
Partiit aalisarneq pillugu politikki, Islandip aningaasaqarneranut pingaaruteqarluinnartoq, isumaqatigiissutigisinnaanngilaat.
Qinersinerup kingorna ministereqarfiugallartup Islandimi naalakkersuineq isumagaa. Aappaagumut missingersuutissat pillugit siunnersuummik saqqummiussisimavoq, taannalu suli akuersissutigineqanngilaq.
Islandip præsidentiata Gudni Jóhannessonip maanna periarfissaraa partiimik allamik toqqaanissani imaluunniit inatsisartut atorunnaarsillugit taamaaliornikkullu qinerseqqinnissaq suaarutigalugu.
