ASSIT & VIDEOt Islandi isumataarfigisinnaagipput

Islandermiup isikkammik arsaallutik nunanut allanut unammisartui EM-imi angusarissaarnerat pigaluttuinnarpoq.
Assi © : Julien/Flickr Creative Commons
Allattoq Mads Pedersen
juunip 28-at 2016 16:25

Tassami ippassaq arsaattartorsuit nunaanneersut, tassa Englandimeersut, 2-1-mik tupaallaatigineqaqisumik ajugaaffigalugit EM-imiit anisippaat.

Tamannalu kalaalerpassuit alutorsaatigaat. Soorliuna alutorsaatigigut? Kalaallit Nunaanni Timersoqatigiit Kattuffianni pisortat tamanna akissutissaqartippaa.

- Inuiaqatigiit mikinerusut anginerit unammillersinnaagaat tarrarsorfigisinnaavagut.
- Killiffitsik anguniarlugu sukataarnikooqaat, tamannalu inumataarnarsinnaavoq. Sungiusimasatsinnit qaffasinnerujussuarmik timersorput, tamannalu uagutsinnut alutornarpoq, Carsten Olsen KNR-imut oqarpoq.

Islanditut iliorta

Nunatsinnia arlaatigut siuarsaassagaangatta Islandimut qiviaqqajaasinnaasarpugut. Tassami assersuutigalugu takornariaqarneq siuarsarniarlugu Islandermiut ingerlalluaqisut isumassarsiorfigisinnaasarpagut.

Immaqa aamma nunatsinni arsaanneq siuarsarniarutsigu Islandermiut qiviarsinnaavagut.  

- Islandermiut imminnut upperinersuat qiimmannaqaaq.

- Nunat assigiinngitsut Isalndi ilanngullugu isumassarsiorfigisinnaavagut. Imminut upperisinnaaneq, minnerunngitsumillu timersuutit, suliniaqatigiiffiit inuillu akornanni suleqatigiillunilu angusaqaqatigiissinnaaneq ilinniarfigisinnaavagut.

- Kalaallit ataatsimoorsinnaanerat takoreerparput. Assammik arsartatartut Argentinamut unammimmata qiviaarnariartigit. Futsalimi qallunaanut savalimmiunullu unamminigut qiviaannariartigit, Carsten Olsen KNR-imut oqarpoq.

Taassuma aamma imminut qiviarnikkut ilikkagaqarsinnaasugut. Amerlanerimmi sapinngisartik tamaat atugassarititaasut aallaavigalugit sungiusarput. Tamannami aallartiffiusariaqarmat.

Ukiut 20-t matuma siorna Islandimi ivigaasanik arsaattarfeqanngilaq taamatullu illup iliuani ivigaasanik arsaattarfeqarani.  Taamaammat silarlutillugu sungiusartoqarsinnaasarsimanani. Soorlu ullumikkut nunatsinni atugassarititaasut taamaattut.

Ullumikkut Islandimi atugassaititaasut mumilluinnarsimaput. Kalaallillu nunaanni aamma ilorraap tungaanut ingerlasugut qularnanngilaq.

- Arsaannermi atugassarititaasut siunissaq eqqarsaatigalugu qularnaarneqartariaqarput. Qujanartumik illoqarfiit assigiingitsut ivigaasalersorneqarput, Carsten Olsen oqarpoq.
Taassumalli oqaatigaa timersuut ataasiinnaq isiginiassallugu naammanngitsoq.

- Arsaanneq kisiat sammisinnaanngilarput. Islandimi arsaanneq assammik arsaannermik angusarissaarnerup kingunerani siuariarnikuuvoq.
Taamaammat timersorneq ataatsimut isigalugu politikkikkut siuarsaasoqartariaqartoq Carsten Olsen isumaqarpoq.  

Assit videollu Islandip EM-erneranut tunngasut allaaserisap ataani isiginnaarsinnaavatit.