Politikki Kulturi

Qimaasoq Khattab Islandip ammasumik tikilluaqquvaa

Qimaasunik nunat tamalaat isumaqatigiissutaat naapertorlugu aalajangersimasumik amerlassusilinnik nunatsinnut tikisitsisinnaanitsinnik suli oqallitoqarpoq. Sanilerpulli Island qimaasunik 500-init amerlanernik 1956-imiilli tikisitsisimavoq.

Allattoq Malik Brøns

februaarip 20-at 2017 09:51

Khattab Al-Mohammad Syriaminngaaneersoq illoqarfimmi Aleppomi inuit imminnut sorsuunneraniit qimaasuuvoq, FN-ip qimaasunik ikiuiniaqatigiiffianit Islandimut qimaaffissarsimasoq. Nuna Khattab Al-Mohammadimut ilaqutaanullu ammasumik ilassinnilluartuusoq.

- Island uannut ilaquttannullu najugaqarfigiuminartuuvoq, innuttaasut maani qimaasunut paasinnittuummata, Khattab Al-Mohammad oqarpoq.

Aleppomiit Akureyrimut

Aleppomi illukorsuit sorsunnermi aserortikkat akornanni aqerlut akornannit Islandimi innermik anitsisartoqarfiusumi sermersuaqarfoiusumilu Akureyrimut. Khattab Al-Mohammadip ilaqutaatalu tassa oqaluttuaat. Akureyrimut ukioq kingulleq januarimi nuupput, tamaanga qimaasuni ilaqutariinni annernut ilaallutik.

Syriami Aleppomi inuit 2012-imi imminnut sorsuutilermata, Khattab ilaquttanilu qimaapput. Khattab ukiut 45-ut sinnerlugit Aleppomi najugaqarsimavoq, ilinniarnertuunngorniarfimmi tuluttut ilinniartitsisuulluni.

Khattab saavani

Nalorninartoq

Taassuma oqaluttuaa Syriamiut millionilikkaat oqaluttuaasa assigaa. Tassalu tamarmik Syriami Præsidentip, Assadip, tunuartikkusuppaat. Pikitsineq Syriamiorpassuit Assadip sakkutuuaniit maannamut kinguneqaannatoq.

- Kammalaatikka ilaqutakkalu amerlasuut toqosut takuakka, angerlasimaffiillu aserorterneqarlutik. Nalorninartorujussuuvoq, takorlooruk najaga massakkut ukiut tallimani tusagaqarfiginngilara, sulilu inuunersoq naluara.